Փաստ ինֆո

Ադրբեջանի միապետ Ալիևը շարունակում է ճնշումներ իրականացնել Հայաստանի իշխանությունների նկատմամբ։ Որևէ կերպ ճանապարհների ապաշրջափակման գաղափարը չի կարելի կապել Լաչինի միջանցքի հետ։ ԱԺ-ում լրագրողների հետ զրույցի ժամանակ ասաց «Հայաստան» խմբակցության ղեկավար Սեյրան Օհանյանը։

Պատգամավորը նկատեց՝ սահմանազատման ու սահմանագծման հիմնախնդիրների թեմայով քննարկումները ցույց կտան, որ ժողովրդի մեջ գոյություն ունի հավաքական կամք՝ թույլ չտալ հակառակորդի կողմից իրականացնել միջանցքի գաղափարը։

«Ապաշրջափակումն առանց ճշգրիտ ուսումնասիրությունների անվտանգության, տնտեսության համակարգում մեծ վնաս է հասցնելու ՀՀ-ին և Արցախին։ Ճանապարհների ենթակառույցների ապաշրջափակումը բերելու է ՀՀ-ի խորը շրջափակման, տնտեսական ճնշման, ինչպես նաև ժողովրդագրական պատկերի փոփոխության»,-ասաց Սեյրան Օհանյանը։

Հարցին, թե հետպատերազմական այս իրավիճակում Հայաստանը պատրա՞ստ է Թուրքիայի հետ հարաբերությունները բարելավելու գործընթաց սկսել, Սեյրան Օհանյանն ընդգծեց՝ «Հայաստան» դաշինքը դեմ չէ ո՛չ խաղաղությանը, ո՛չ սահմանազատման ու սահմանագծման խնդիրներին և ոչ էլ հարևանների հետ համապատասխան հարաբերություններ ձևավորելուն, բայց յուրաքանչյուր գործընթաց իր ընթացակարգերն ունի։

«Ես չեմ տեսնում, որ այսօր ՀՀ-ի նկատմամբ Թուրքիայի և Ադրբեջանի վարած քաղաքականությունը, Արցախի և Հայաստանի սահմանամերձ բնակավայրերի բնակչության նկատմամբ տարբեր ահաբեկչություններով պատրաստ են նման քայլերի գնալու։ Իհարկե պետք չէ վախենալ ո՛չ Թուրքիայից, ո՛չ էլ Ադրբեջանից։ Մենք վաղուց արդեն չենք վախենում, նախորդ պատերազմի ժամանակ էլ չենք վախեցել, բայց ռիսկերը, վտանգները միշտ էլ կան։ Նախորդ իշխանությունների ժամանակ էլ դիվանագիտական հարաբերությունների, սահմանների հետ կապված խնդիրները կարող էին լուծվել միայն առանց նախապայմանների»,-ասաց Սեյրան Օհանյանը։

Աղբյուր` Փաստինֆո