Փաստ ինֆո

Ինչի՞ դիմաց է տեղի ունենալու Թուրքիայի հետ հարաբերությունների բարելավումը, և ինչու՞ ենք հայ-թուրքական հարաբերությունների կարգավորման հանձնաժողովի ստեղծման մասին իմանում Թուրքիայից, այլ ոչ մեր երկրից։ «Փաստինֆո»-ի հետ զրույցի ժամանակ այս մասին ասաց ադրբեջանագետ Արմինե Ադիբեկյանը։

Նրա արձանագրմամբ՝ այս մասին պետք է տեղեկանայինք ՀՀ ԱԳՆ-ից, որը պետք է ծառայի մեր շահերին, բայց փոխարենը տեղեկանում ենք Թուրքիայի ԱԳ նախարարից։

«Ստացվում է՝ ՀՀ ԱԳՆ-ի գործառույթները կատարում է Թուրքիայի ԱԳՆ-ն։ Եթե պատրաստ են և համաձայն են Թուրքիայի հետ իրենց հարաբերությունները բարելավել, հարց է առաջանում, թե ինչի՞ դիմաց ենք պատրաստ այդ բարելավմանը։ Ո՞րն է լինելու դրա գինը։ Ի՞նչ գին են պատրաստ վճարել, որ Խաչատուր Սուքիասյանը շարունակի

Թուրքիայից էժան տրիկոտաժ կամ այլ ապրանք բերել։ Առ այսօր տեղյակ չենք, թե ինչ զիջումների է պատրաստ հայկական կողմը կամ ինչ պահանջներ ունի։ Ի վերջո` ՀՀ-ն ոչխար չի, որ սուսուփուս տանեն մատաղ անելու»,-նշեց Արմինե Ադիբեկյանը։

Չնայած հստակ գիտենք, թե Թուրքիան ու Ադրբեջանն ինչ են ուզում ստանալ, բայց չգիտենք, թե Հայաստանն ինչ պահանջներ ու ակնկալիքներ ունի կամ առհասարակ ո՞րն է լինելու Հայաստանի շահն այս հարաբերությունների կարգավորման արդյունքում։ Ադրբեջանագետն ընդգծում է, որ պատասխանատու կառույցները, որոնք պարտավոր են իրազեկել իրենց քայլերի մասին, քար լռություն են պահպանում։

Դիտարկմանը, որ որպես «շահ» իշխանության ներկայացուցիչները ներկայացնում են ճանապարհների ապաշրջափակումը, որն ըստ իրենց՝ տնտեսական օգուտ կբերի Հայաստանին, Արմինե Ադիբեկյանը վստահեցրեց՝ ՀՀ-ն այդ ճանապարհներից չի օգտվելու։

«Թուրքիան և Ադրբեջանը ներդրումներ են կատարում, այսքան ջանք թափում ոչ թե Հայաստանին հարստացնելու, այլ Հայաստանի ոչնչացման գործընթացն էլ ավելի արագացնելու համար։ Երբ թուրքական էժան ապրանքները կլցվեն հայկական շուկա և կսպանեն հայկական արտադրողին, այն ժամանակ կտեսնենք մեր տնտեսության մահը, որովհետև մի տնտեսություն, որն արտադրություն չունի, չի կարող զարգանալ»,-նշեց ադրբեջանագետը։

Արմինե Ադիբեկյանը նշում է, որ ոչ մի գործարան, ֆաբրիկա չի կառուցվելու այստեղ, և տնտեսական աճի ու զարգացման միֆերը կարող են գործել միայն մանր առևտրականների համար, որոնք էժան ապրանք են բերելու և թանկ գնով վաճառեն։

Նրա խոսքով Նիկոլ Փաշինյանը երեք տարվա ընթացքում քանդեց պետությունն ու պետականությունը՝ արմատախիլ անելով ազգային գաղափարախոսությունը, Հայաստանին դնելով ներկա վիճակի մեջ, իսկ ինքն անձամբ անում է այն, ինչ ասում են։

«Այստեղ բանակցային գործընթաց չկա, սա պարտադրանքի գործընթաց է»,-հավելեց Արմինե Ադիբեկյանը։

Աղբյուր` Փաստինֆո