Փաստ ինֆո

Թուրքիայում՝ ազգային արժույթի սրընթաց անկումով պայմանավորված սոցիալական վիճակն ավելի է սրվում։ Հացի համար հերթերը չեն պակասում։ Ստամբուլի ընդդիմադիր քաղաքապետ Էքրեմ Իմամօղլուն հայտարարել է, որ լիրայի կտրուկ անկումն ու գնաճը հանգեցրել են Թուրքիայի քաղաքացիների աղքատացմանը։ Նա նաև քննադատել է էժան հացի համար հերթերի տեսանյութերի հրապարակումը։

«Ցավոք, մեր մարդիկ աղքատացել են, դա փաստ է, բայց ես դժգոհ եմ մեր հայրենակիցներից, որոնք հերթ են կանգնել էժան հաց գնելու համար ու տեսանյութեր հրապարակել», - Twitter-ում գրել է Իմամօղլուն։

Բացի այդ, նա հիշեցրել է, որ ալյուրը մեկ տարում 127 լիրայից թանկացել է մինչև 325 լիրա: «Մենք ամեն ինչ կանենք Ստամբուլի բնակիչներին էժան հացով ապահովելու համար», - հավելել է քաղաքապետը։

Չնայած քաղաքապետը դժգոհություն է հայտնել, համացանցում շարունակվում են տարածվել կադրեր, թե ինչպես են բնակիչները Ստամբուլի փողոցներում էժան հացի համար երկար հերթեր կանգնում։

Հացի գինը սուբսիդավորվում է քաղաքի ղեկավարության կողմից։ «Ժողովրդական հացը» կրպակներում վաճառվում է 1,25 լիրայով, այն դեպքում, երբ խանութներում թանկացումից հետո հացն արժե 2,5-3,5 լիրա։

Ավելի վաղ տեղեկացրել էինք, որ վերջին ամիսների ընթացքում Թուրքիայի դրամական միավորը՝ լիրան, շարունակում է օրեցօր արժեզրկման ռեկորդներ գրանցել դոլարի, եվրոյի և ֆունտ ստերլինգի նկատմամբ։

Դեկտեմբերի 13-ին, թարմացնելով դոլարի նկատմամբ նոյեմբերի 30-ին գրանցած պատմական ռեկորդը, թուրքական լիրայի փոխարժեքը հասել է 14․7590-ի։

Լիրան արժեզրկման ռեկորդ է գրանցել նաև եվրոյի ու ֆունտ ստերլինգի նկատմամբ։ Արտարժույթի շուկայում գործարքները կատարվում են 1 եվրո/1.65 լիրա փոխարժեքով։ 1 ֆունտ ստերլինգի դիմաց թուրքական լիրան արժեզրկվել է՝ հասնելով 18.44-ի։ Իսկ մեկ գրամ ոսկու արժեքը հատել է 825 լիրայի շեմը։

Աղբյուր` Փաստինֆո