Փաստ ինֆո

Ակնհայտ է, որ Թուրքիան և Ադրբեջանն այսօր թուլացած Հայաստանից և իրենց շահերը սպասարկող իշխանություններից ցանկանում են պոկել ամեն ինչ։ Խորհրդարանում լրագրողների հետ ճեպազրույցի ժամանակ այս մասին ասաց «Հայաստան» խմբակցության քարտուղար Արծվիկ Մինասյանը։

«Այս վտանգավոր միտումը տանելու է մեր պետականության վերջնական կործանմանը։ Այս մարդիկ կա՛մ չեն գիտակցում, կա՛մ հատուկ են անում այդպես, որ մենք անընդհատ հայտնվենք թուրք-ադրբեջանական ճիրաններում»,-ասաց Արծվիկ Մինասյանը։

Հարցին, թե ի՞նչ զարգացումներ տեղի ունեցան, որ Անկարայից հնչեց հայտարարություն այն մասին, որ Թուրքիան և Հայաստանը հատուկ ներկայացուցիչներ կնշանակեն երկկողմ հարաբերությունների կարգավորման ուղղությամբ քայլերի համար, Արծվիկ Մինասյանը հորդորեց հարցն ուղղել իշխանություններին, քանի որ պարբերաբար նրանք էին «կառուցողական» որակում Ադրբեջանի ղեկավարին, Թուրքիայից եկող դրական ազդակների մասին էին խոսում։

«Ակնհայտ է, որ սա մեր ազգային նպատակներին չի ծառայելու»,-նշեց պատգամավորը։

Հարցին՝ ՀՅԴ-ն դե՞մ է, որ Հայաստանն ու Թուրքիան փորձեն բարիդրացիական հարաբերություններ ձևավորել, Արծվիկ Մինասյանը նկատեց՝ եթե խոսքը գնում է առանց նախապայմանների հարաբերություններ հաստատելու մասին, ապա դա հնարավոր է։

«Երբ խոսում եք բարիդրացիական հարաբերություններից, ու՞մ հետ, մի պետության, որն ուզում է քեզ ոչնչացնի՞։ Դրա հետ ի՞նչ բարիդրացիություն։ Պետք է միջազգային իրավունքի շրջանակներում քո իրավունքները պաշտպանես։ Առանց մեր ազգային իրավունքները հարգելու, պաշտպանելու, ի՞նչ բարիդրացիական։ Ո՞նց եք պատկերացնում, ձեր թշնամին պատրաստ է ամեն օր և ամեն ժամ մորթի ձեզ, ոչնչացնի, խլի ձեր տունը, դրա հետ ի՞նչ բարիդրացիություն են ուզում»,-ասաց Արծվիկ Մինասյանը։

Աղբյուր` Փաստինֆո