Փաստ ինֆո

Թուրքիայի արտգործնախարարը նախօրեին խորհրդարանում խոսել է Հայաստանի հետ հարաբերությունների կարգավորման մասին։ Մևլութ Չավուշօղլուն մասնավորապես հայտնել է, որ Անկարան կաշխատի Երևանի հետ հարաբերությունների կարգավորման ուղղությամբ։

Ըստ երկրի ԱԳ ղեկավարի, Հայաստանի հետ հարաբերությունները կարգավորելու համար շուտով հատուկ ներկայացուցիչներ կնշանակեն փոխադարձության սկզբունքով։ Չավուշօղլուն նաև հայտնել է, որ չարթերային թռիչքներ կլինեն դեպի Երևան։ Վերջինս խորհրդարանում ելույթի ժամանակ հայտնել է, որ Անկարան բոլոր քայլերը համակարգելու է Ադրբեջանի հետ։ 

Ամերիկյան հայտնի Bloomberg պարբերականը անդրադարձել է բարձրաստիճան թուրք պաշտոնյայի ելույթին։ Հոդվածագիրը նշում է, որ Թուրքիայի անսպասելի հայտարարությունը Հայաստանի հետ հարաբերությունները կարգավորելու պատրաստակամության մասին համապատասխանում է նախագահ Ջո Բայդենի խնդրանքին:

Պարբերականը հիշեցրել է, որ հոկտեմբերի 31-ին G20-ի գագաթնաժողովի շրջանակներում Հռոմում կայացած հանդիպման ժամանակ ԱՄՆ նախագահ Ջո Բայդենը Թուրքիայի նախագահ Ռեջեփ Թայիփ Էրդողանին կոչ էր արել բացել դեպի ծով ելք չունեցող Հայաստանի հետ սահմանը։ Թուրքիան Հայաստանի հետ սահմանը փակել է 1993 թվականին` ի նշան Հայաստանի և Ադրբեջանի միջև պատերազմի դեմ բողոքի։

«Թուրքիան հուսով է, որ Հայաստանի հետ հարաբերությունների կարգավորման քայլերը կօգնեն Անկարային՝ բարելավել Վաշինգտոնի հետ լարված հարաբերությունները, որոնք լարվել են՝ կապված ռուսական հակաօդային պաշտպանության համակարգերի գնման հետ։ Բայդենի և Էրդողանի հանդիպումից հետո երկու երկրները մեխանիզմ են ստեղծել՝ լուծելու ՆԱՏՕ-ի երկու դաշնակիցների հարաբերությունները թունավորած խնդիրները, որոնք կիսում են անվտանգության և տնտեսության բնագավառում ավելի լայն շահեր»։

Հեղինակավոր պարբերականը նշում է, որ Էրդողանը կարող է մեծ օգուտներ քաղել արտաքին քաղաքական ցանկացած քայլից, որը կօգնի կայունացնել տնտեսությունը, քանի որ աննախադեպ գնաճը 2023 թվականի ընտրություններից առաջ սպառնում է նրա ժողովրդականությանը։

Աղբյուր` Փաստինֆո