Փաստ ինֆո

Մինչ այս պահն ընդդիմությունից պատասխան չունենք, թե ինչ քայլեր կձեռնարկեին, որ ստեղծված իրավիճակում խուսափեին պատերազմից։ Խորհրդարանական ճեպազրույցի ժամանակ այս մասին ասաց «Քաղաքացիական պայմանագիր» խմբակցության պատգամավոր Էդուարդ Աղաջանյանը։

Պատգամավորը հիշեցրեց, որ վերջին հարցուպատասխանի ժամանակ ՀՀ վարչապետ Նիկոլ Փաշինյանն ընդդիմադիրներին առաջարկել էր հստակ պատասխանել, թե իրենք կոնկրետ ինչ քայլեր կձեռնարկեին, որ խուսափեին պատերազմից, սակայն ընդդիմությունն այդպես էլ չի պատասխանել հարցին։

«Քիչ առաջ Արծվիկ Մինասյանն անդրադարձել է այս հարցին, բայց ուզում եմ արձանագրել, որ չի ասել, թե կոնկրետ ինչ կանեին։ Սա կարևոր արձանագրում է, որ հանրությունը պետք է անի և խոսում է այն մասին, որ ընդդիմադիրների կողմից այս թեմայի վերաբերյալ բոլոր պնդումները, հարցադրումները բացարձակապես այլ նպատակներ ունեն, այն է՝ հանրությանը մոլորության մեջ գցելն է»,-ասաց Էդուարդ Աղաջանյանը։

Պատգամավորը նշեց, որ ընդդիմադիրների կողմից տարբեր առիթներով պարբերաբար հնչում են բողոքներ այն մասին, որ ընդդիմադիրները չունեն հնարավորություն և հասանելիություն այն ինֆորմացիային, որն ունի կառավարությունը։

«Մենք և մեր հանրությունն արդեն հոգնել է այս պնդումներից ու բողոքներից, որովհետև արդեն որերորդ անգամն է հայտարարել ենք, որ պատրաստ ենք ցանկացած ձևաչափով բոլոր հարցերին պատասխան տանք։ Հաշվի առնելով, որ ընդդիմադիր գործընկերները հանդիսանում են ԱԺ պատգամավորներ, նրանք ունեն գաղտնիության թույլտվությունը, և մենք մշտապես պատրաստ ենք եղել այդ ինֆորմացիան տրամադրել իրենց»,-ասաց Էդուարդ Աղաջանյանը։

Աղբյուր` Փաստինֆո