Փաստ ինֆո

Երևանի ընդհանուր իրավասության դատարանի դատավոր Զարուհի Նախշքարյանին կարգապահական պատասխանատվության ենթարկելու վերաբերյալ միջնորդության քննությանը ԲԴԽ անդամ Մխիթարյանը չի մասնակցի։ «Փաստինֆո»-ի թղթակցի հաղորդմամբ՝ ԲԴԽ֊ում մեկնարկել է դատավոր Զարուհի Նախշքարյանի նկատմամբ կարգապահական պատասխանատվության ենթարկելու վերաբերյալ նիստը։ Մինչ միջնորդության, ըստ էության քննությունը, ԲԴԽ անդամ Անի Մխիթարյանը հայտարարեց՝ ինքնաբացարկ հայտնելու մտադրության մասին՝ ներկայացնելով հիմքերը։ Խորհրդակցական սենյակում դատարանը որոշեց բավարարել ինքնաբացարկի միջնորդությունը։ ԲԴԽ անդամ Մեսրոպ Մակյանը ևս բարձրաձայնեց ինքնաբացարկի հիմքերի մասին՝ նշելով, որ բոլորովին վերջերս հայց էր ներկայացրել՝ գումարի բռնագանձման պահանջի մասին, որը դատավոր Նախշքարյանի կողմից բավարարվել է, հետևաբար, օբյեկտիվ դիտորդի մոտ կարող են կասկածներ լինել՝ իր անկողմնակալության վերաբերյալ, մինչդեռ, Նախշքարյանը նշեց, որ այդ կասկածները կարող են փարատվել՝ նախորդ վարույթի վերաբերյալ որոշմամբ, որով Մակյանը կողմ էր քվեարկել իրեն պատասխանատվության ենթարկելուն։ ԲԴԽ֊ն մերժեց Մակյանի ինքնաբացարկի միջնորդությունը։ 

Դատավոր Նախշքարյանի ներկակացուցիչը բարձրաձայնեց ԲԴԽ իրավաբան֊անդամ Լիպարիտ Մելիքջանյանին բացարկ հայտնելու հարցը, ինչի հիմքում դրվել է այն հանգամանքը, որ վերջինս ԲԴԽ անդամ է ընտրվել նախկին քաղաքական ուժի կողմից, մինչդեռ նախկին քաղաքական ուժի կեղմից ընտրված բոլոր իրավաբան֊գիտնականները տարբեր ժամանակահատվածներում հրաժարական են տվել։ Բացի այդ՝ Մելիքջանյանը Նիկոլ Փաշինյանի հետ նույն դպրոցն է հաճախել, դպրոցական տարիներին շփվել են։ ԲԴԽ֊ն մերժեց բացարկի միջնորդությունը, իսկ Գագիկ Ջհանգիրյանն էլ պարզաբանեց, որ Փաշինյանը և Մելիքջանյանը չեն հաճախել նույն դպրոցը։

Այս պահին Զ.Նախշքարյանի ներկայացուցիչը ինքնաբացարկի միջնորդություն են ներկայացնում ԲԴԽ գիտնական անդամների վերաբերյալ՝ նշելով, որ նրանք ԲԴԽ դանդամ են ընտրվել ոչ թե խորհրդարանի, այլ կոնկրետ մեկ քաղաքական ուժի կողմից, որի պայմաններում չի կարող այդ քաղաքական ուժից անկախ լինել, առավել եւս երբ գործը վերաբերում է այդ քաղաքական ուժի ղեկավարի մասին։

Հիշեցնենք, որ դատավոր Զարուհի Նախշքարյանի նկատմամբ կարգապահական վարույթ է հարուցվել ՀՀ արդարադատության նախարարության կողմից՝ Հանրային խորհրդի նախկին նախագահ Ստյոպա Սաֆարյանի հաղորդման հիման վրա։ Ընդ որում՝ Ստյոպա Սաֆարյանը վարույթի հարուցման մասին հայտնել էր մինչև նախարարության կողմից համապատասխան միջնորդություն ԲԴԽ ներկայացնելը, ինչի իրավունքը չուներ։

Հեղինակ՝ Իզաբել Սահակյան

Աղբյուր` Փաստինֆո