Փաստ ինֆո

Ավտոբուսների վարորդները, որոնք հրաժարվել էին երթուղի դուրս գալ, քիչ առաջ դադարեցրին բողոքի ակցիան՝ գտնելով, որ խնդիրներին լուծում է տրվել։ 

«Մեր պահանջներն են գազի հարցերը, աշխատավարձը, մարդկային պայմանները, վարորդին հարգելը։ Ասում են՝ 260 հազար դրամ աշխատավարձ, 14 օր որ ես աշխատեմ, դրանով ընտանիք չեմ կարող պահել։ Հիմա եթե բախտ է լինում, 22 օր աշխատում եմ և ստանում եմ 120 հազար դրամ, գումարած օրական էլ 7-8 հազար դրամ դնում եմ «ջեբս», գնում եմ տուն»,-ասաց վարորդներից մեկը՝ հավելելով, որ իրենք նախևառաջ պահանջում են նորմալ աշխատավարձ։

Նրա խոսքով՝ հիմա իրենք պահանջում են 350 հազար դրամ, քանի որ մեկ կգ խոզի միսը 4000 դրամ է դարձել, իսկ վարորդը, որ փլավ ուտի, չի կարող քշել։ Նա հայտարարեց, որ նախկինում ընդհանուր 350 000 դրամ է ստացել, մինչդեռ այսօր ստանում է 260.000 դրամ։ Վերջինս հայտարարեց, թե դա իրենց գրպանների համար չեն անում, ազգի համար են անում։

Վարորդները պահանջում են նաև հիգիենայի պայմանների ապահովում, մասնավորապես, զուգարաններ՝ համապատասխան վերջնակետերում։

Քննարկումներից հետո վարորդներից մեկը լրագրողների հետ զրույցում հայտնեց, որ իրենց խնդիրները 99 տոկոսով լուծվել են. «Աշխատավարձը բարձրացել է, առաջին շարքը բաց է լինելու, զուգարանների հարցը լուծվելու է»։

Աղբյուր` Փաստինֆո