Փաստ ինֆո

Իշխանություններն ամեն ինչ անում են ՀՀ բանակը քայքայելու համար։ Աննախադեպ է, որ հայրենիք վերադարձող գերիներին օդանավակայանից անմիջապես ԱԱԾ տանեն։ «Փաստինֆո»-ի հետ զրույցի ժամանակ ասաց ՀՀ մարդու իրավունքների առաջին պաշտպան Լարիսա Ալավերդյանը։

Նրա խոսքով՝ իշխանական ներկայացուցիչների կողմից հնչող հայտարարությունները որևէ առնչություն չունեն հումանիտար իրավունքի այն հոդվածների հետ, համաձայն որոնց՝ գերիները պարտադիր պետք է հայրենիք վերադառնան։

Լարիսա Ալավերդյանը նշում է, որ եթե անգամ նոյեմբերի 9-ի փաստաթուղթը գոյություն չունենար, միևնույն է, գոյություն ունեն միջազգային փաստաթղթեր, որոնք ստորագրել է և՛ Հայաստանը, և՛ Ադրբեջանը, հետևաբար դրանցով Ադրբեջանը պարտավորվում է վերադարձնել բոլոր գերիներին։ Չնայած Ադրբեջանը հայտարարել է, որ Հայաստանին է վերադարձրել բոլոր ռազմագերիներին և այժմ Բաքվում պահվող անձանց ներկայացնում որպես հանցագործներ, պարզ է, որ նրանք պարզապես ոտնահարում են միջազգային նորմերը։

«Հայաստանը հանձնել է այն տարածքները, որոնք նոյեմբերի 9-ի փաստաթղթով պետք է չհանձնվեին։ Այդ երկու շրջանն առանց մեկ կրակոցի հանձնվել են։ Այդտեղ դեռ կային նրանք, ովքեր շարունակում էին իրենց պայքարը։ Ողջ մնացած և կռվող ջոկատների զինծառայողներին հանձնել են Ադրբեջանին։ Հետագայում այդ գերիները դարձել են կեղտոտ քաղաքական առևտրի առարկա»,-նշեց Լարիսա Ալավերդյանը։

Վերջինս նշում է, որ հայրենիք վերադարձող գերիներին առանց ֆիզիկական և հոգեբանական վերականգնողական աշխատանքների ԱԱԾ տանելը և հարցաքննելը բնութագրում է իշխանությունների դաժան և անմարդկային վերաբերմունքը գերիների նկատմամբ։ Այդ մասին են վկայում իշխանության ներկայացուցիչների կողմից արվող հայտարարությունները։ Ավելին, նրա դիտարկմամբ՝ իշխանությունները շարունակում են իրականացնել քայլեր ու գործողություններ, որոնք միայն նպաստում ու սպասարկում են թուրք-ադրբեջանական ցեղասպանական քաղաքականությանը։

ՀՀ առաջին ՄԻՊ-ի կարծիքով այդ հայտարարությունների նպատակը կարող է լինել նաև այն, որ գերիները հրաժարվեն հայրենքի վերադառնալ և երրորդ երկիր գնալու ցանկություն հայտնեն։

«Երկրորդ համաշխարհային պատերազմից հետո էլ բոլորը գիտեին, որ կա հրամանագիր, որով վերադարձած գերիներին կա՛մ ոչնչացնում են, կա՛մ Սիբիր են ուղարկում։ Հիմա իրենց ժողովրդավարության առաջադեմ ջոկատ համարող իշխանությունը կրկնում է ստալինյան ռեպրեսիաների ժամանակ եղած այդ նույն գործողությունը։ Իհարկե, հնարավոր է, որ գերությունից վերադառնալուց և վերականգնողական փուլ անցնելուց հետո սկսվի քննություն, բայց աննախադեպ է, երբ նրանք դեռ գերության մեջ են, իսկ իշխանությունները նման հայտարարություններ են անում։ Գերիների համար երրորդ երկիր գնալու նախադրյալներ ստեղծելը ևս հիմքեր ունի։ Նրանք հույս չունեն, որ բոլոր վերադարձողները կեղծ ցուցմունքներ կտան։ Վախենում են, որ կբացահայտվեն այս իշխանությունների՝ հանցագործության հատկանիշներ ունեցող քայլերը, դրա համար էլ շահագրգռված են, որ գերիներն ուրիշ երկիր գնան»,-ասաց Լարիսա Ալավերդյանը։

Հարցին՝ հնարավոր համարու՞մ է, որ հայրենիք վերադարձած գերիները կեղծ ցուցմունք տան, Լարիսա Ալավերդյանը նկատեց՝ իր այդ համոզմունքը հայտնում է, քանի որ ավելի վաղ տարիների փորձն ունի։

«Երբ Գագիկ Ջհանգիրյանը նախկին զինդատախազ էր, այդ ժամանակ հայտարարել եմ, որ բանակում սպանությունների շուրջ ստեղծած մթնոլորտը ծնել է կեղծ ցուցմունք տվող խավ։ Առնվազն երկու գործերով ապացույց ունեմ, որ ճնշման ներքո զինվորներին պարտադրել են կեղծ ցուցմունք տալ։ Դրա համար եմ հիմա ամբողջովին համոզված դրանում»,-ասաց Լարիսա Ալավերդյանը։

Աղբյուր` Փաստինֆո