Փաստ ինֆո

ՀՀ արդարադատության նախարարության ներկայացուցիչները պնդում են՝ Երևանի ընդհանուր իրավասության դատարանի դատավոր Զարուհի Նախշքարյանը կոպիտ անփութությամբ թույլ է տվել կարգապահական խախտում՝ դուրս գալով հայցապահանջի շրջանակներից, սակայն հստակեցնել, թե, ի վերջո, ինչպես է դրսևորվել ենթադրյալ խախտումը, նախարարությանն այդպես էլ չի հաջողվել։

«Փաստինֆո»-ի թղթակցի հաղորդմամբ՝ ԲԴԽ-ում այսօր կայացել է Երևանի ընդհանուր իրավասության դատարանի դատավոր Զարուհի Նախշքարյանին կարգապահական պատասխանատվության ենթարկելու մասին միջնորդության քննությունը, որի ընթացքում ՀՀ արդարադատության նախարարի խորհրդական Գագիկ Հարությունյանը ներկայացրեց միջնորդությունը, ինչից հետո դատավորը և նրա ներկայացուցիչները հարցեր ուղղեցին։

Հիշեցնենք, որ դատավոր Զարուհի Նախշքարյանի նկատմամբ կարգապահական վարույթ է հարուցվել ՀՀ արդարադատության նախարարության կողմից՝ Հանրային խորհրդի նախկին նախագահ Ստյոպա Սաֆարյանի հաղորդման հիման վրա։ Ստյոպա Սաֆարյանը «դժգոհ» էր մնացել դատավորի կայացրած որոշումից, որով դատարանը Սաֆարյանին պարտավորեցրել էր ներողություն խնդրել լրագրողից և վճարել 600.000 ՀՀ դրամի չափով փոխհատուցում։ Խոսքը լրագրող Թագուհի Ասլանյանն ընդդեմ Ստյոպա Սաֆարյանի գործով կայացված որոշման մասին է։ Գործով հայցի հիմքը Ստյոպա Սաֆարյանի հրավերն ու դրան հետևած քննարկումն է, որով Սաֆարյանը սահմանափակել էր լրատվամիջոցների մուտքը միջոցառմանը՝ կազմելով համապատասխան ցուցակ, իսկ երբ քննարկմանը չհրավիրված լրատվամիջոցների լրագրողները ներկայացել են միջոցառմանը՝ փորձելով հարցեր տալ Սաֆարյանին, հրավիրել խմբագրություն՝ հարցազրույցի, Սաֆարյանը պատասխանել է. «Աշխատեք ձեր վրա, կատարելագործվեք: Մենք միայն կայացածներին ենք հրավիրել: Դուք ինձ հրավերներ մի ուղարկեք ո՛չ սաունաների, ո՛չ ձեր տարածքների, ո՛չ ձեր տների: Դուք իմ կինը չեք, որ ինձ տեղ հրավիրեք, ինձ միայն իմ կինը կարող է տեղ հրավիրել»: Դատավոր Զարուհի Նախշքարյանը բավարարել էր լրագրողի հայցադիմումը՝ պարտավորեցնելով Սաֆարյանին՝ ներողություն խնդրել լրագրողից։ Դատարանի՝ սույն որոշումից Սաֆարյանը «դժգոհ» է մնացել և հաղորդում ներկայացրել ՀՀ արդարադատության նախարարություն, ինչի հիման վրա էլ վարույթ է հարուցվել։

«Փաստինֆո»-ի հաղորդմամբ՝ ՀՀ արդարադատության նախարարության ներկայացուցիչ Գագիկ Հարությունյանը, ներկայացնելով միջնորդությունը, նշել է, որ դատարանը դուրս է եկել հայցապահանջի շրջանակներից, քանի որ դատական ակտում գնահատական է տրվել նաև «ներխուժելու» մասին արտահայտությանը, մինչդեռ, հայցվոր կողմը դա որպես վիրավորական արտահայտություն չէր մատնանշել հայցի հիմքում և առարկայում։ Նախարարությունը գտնում է, որ դատավորը թույլ է տվել խախտում՝ կոպիտ անփութությամբ։

Նախարարության ներկայացուցիչներին հարցեր ուղղեցին դատավորի ներկայացուցիչ Սիրանուշ Սահակյանը և դատավորը՝ Զարուհի Նախշքարյանը, որը նիստի ընթացքում երկու անգամ սաստեց իր թիկունքում նստած Ստյոպա Սաֆարյանին՝ նշելով, որ վերջինս խանգարում է իրեն. արդյունքում ԲԴԽ-ն որոշեց տեղափոխել Ստյոպա Սաֆարյանին՝ դատավորից հեռու։ Հարցուպատասխանի արդյունքում էլ Սիրանուշ Սահակյանն արձանագրեց՝ նախարարության ներկայացուցիչների դիրքորոշումները թեպետ հայերեն էին, սակայն իր համար ընկալելի չէին, խնդրեց հասկանալի լեզվով բացատրել՝ ինչ է դիմող կողմի ուզածը, ի վերջո, ինչ է վերագրվում դատավորին, սակայն Հարությունյանը հրաժարվեց պարզաբանումներ ներկայացնելուց։ Դրան ի պատասխան դատավոր Նախշքարյանը հետաքրքրվեց, թե երբ է ինքը թույլ տվել խախտումը, իսկ նախարարության ներկայացուցչի ճշգրտող հարցին, թե ինչ նկատի ունի դատավորը՝ Նախշքարյանը նշեց, որ չի պատրաստվում պարզաբանել իր հարցը, այլ սպասում է իր ուղիղ տված հարցի պատասխանին։ Բացի այդ՝ դատավորն ուշադրություն հրավիրեց նաև այն հանգամանքին, որ ո՛չ Վերաքննիչ դատարանը, ո՛չ նախարարությունը չեն մատնանշել ապացույցների բեռի բախշման արձանագրությունը, ինչի ընթացքում ինքը բացահայտել է հայցի հիմքի և առարկայի ընկալման հարցը, որ և՛ Վերաքննիչ դատարանը, և՛ նախարար Կարեն Անդրեասյանը քաղհան են արել՝ ներկայացնելով արձանագրությունը ոչ ամբողջությամբ։ Դատավորի հարցին ի պատասխան Գագիկ Հարությունյանը նշեց, որ այլ հարց է, թե դատավորն ինչպես է ընդլայնել հայցի հիմքի վերաբերյալ հնարավոր ընկալումը և այլ հարց է, թե ինչպես պետք է ընկալեր։ Դատավորն էլ արձագանքեց՝ «Թե ինչպես պետք է դատարանն ընկալեր՝ դա նախարարի գործը չէ արդեն, դատավորի գործն է»։

Դատավորի և նրա ներկայացուցչի հարցադրումներին նախարարության կողմից հոդաբաշխ որևէ բացատրություն չտրվեց, իսկ աշխատանքային ժամի ավարտով պայմանավորված՝ ԲԴԽ նիստը հետաձգվեց, հաջորդ նիստը կկայանա դեկտեմբերի 20-ին՝ ժամը 15.00-ին։

Հեղինակ՝ Իզաբել Սահակյան

Աղբյուր` Փաստինֆո