Փաստ ինֆո

 «Միասնական Վարդենիս» դաշինքի ցուցակը գլխավորող Արամ Հարությունյանին կալանավորելու որոշումն ապօրինի է, վերաքննիչ բողոք կներկայացվի: Այս մասին «Փաստինֆո»-ի հետ զրույցում ասաց Վարդենիս համայնքի նախկին ղեկավար, «Միասնական Վարդենիս» դաշինքի ցուցակը գլխավորող Արամ Հարությունյանի պաշտպան Բակուր Օհանյանը։

Ինչպես արդեն տեղեկացրել ենք՝ Վարդենիս համայնքում ՏԻՄ ընտրություններում ՔՊ-ի պարտությունից հետո ՔԿ-ն ձերբակալել է  ընդդիմադիր թեկնածու Արամ Հարությունյանին՝  ավելի քան երկու տարի քննվող քրեական գործի շրջանակներում, որով Հարությունյանի նկատմամբ արդեն իսկ ընտրված էր խափանման միջոց գրավը։ Նախաքննական մարմինը փոփոխել է Արամ Հարությունյանի մեղադրանքը ու կալանավորելու միջնորդություն ներկայացրել: Մասնավորապես, Հարությունյանը նախկինում մեղադրվում էր ՀՀ քրեական օրենսգրքի 325-րդ հոդվածի 2-րդ մասով, ՀՀ քրեական օրենսգրքի 178-րդ հոդվածի 3-րդ մասի 1-ին կետով և ՀՀ քրեական օրենսգրքի 315.2-րդ հոդվածով, իսկ այժմ՝ ՀՀ քրեական օրենսգրքի 308-րդ հոդվածի 1-ին մասով (երկու դրվագ), 325-րդ հոդվածի 2-րդ մասով, 178-րդ հոդվածի 3-րդ մասի 1-ին կետով:

Փաստաբանի փոխանցմամբ՝ Արամ Հարությունյանի նկատմամբ կալանավորումը որպես խափանման միջոց ընտրելու մասին որոշումը կայացրել է Գեղարքունիքի մարզի ընդհանուր իրավասության դատարանի դատավոր Ստեփանյանը, ինչն ակնհայտ  ապօրինի դատական ակտ է, որը ոչ միայն չի բխում արդարադատության շահից, այլև՝ ներկայացնում է այլոց շահերը: Օհանյանի խոսքով՝ դատական ակտը ոչ միայն պատճառաբանված չէ, այլև  դատավորը որոշմամբ այնպիսի գործողություններ է կատարել, ինչի իրավունքը ՀՀ քրեական դատավարության օրենսգրքով չունի:Մասնավորապես՝ փաստաբանը պարզաբանեց, որ  նրա նկատմամբ արդեն իսկ կար ընտրված խափանման միջոց՝  գրավ՝ 10 մլն դրամի չափով:

«Բնականաբար, դատավորը չէր կարող երկրորդ խափանման միջոց ընտրել, ինչն արգելվում է օրենքով, որոշում է կայացրել՝ որպես խափանման միջոց գրավը վերացնել և կալանավորումը կիրառել որպես խափանման միջոց, մինչդեռ ՀՀ քրեական դատավարության օրենսգիրքը սահմանում է կոնկրետ սուբյեկտները, թե ովքեր կարող են որպես խափանման միջոց կիրառված գրավը վերացնել. Նրանք են՝  դատախազությունը, ինչպես նաև  քննիչը՝ դատախազի թույլտվությամբ, իսկ դատավորին նման լիազորություն օրենքով տրված չէ, ինչն օրենքի կոպիտ խախտում է, նաև իր մեջ հանցագործության տարրեր կարող է պարունակել »,- նշեց փաստաբանը՝ չբացառելով, որ հետագայում գուցե բարձրացվի դատավորի նկատմամբ կարգապահական վարույթ հարուցելու հարցը:

Անդրադառնալով  մեղադրանքի փոփոխմանը և Հարությունյանին ՀՀ ՔՕ 308-րդ հոդվածով մեղադրանք առաջադրելուն՝ Օհանյանը, նախաքննական գաղտնիությունից ելնելով, զերծ մնաց մանրամասներ հայտնելուց, միայն ընդգծեց, որ մեղսագրվող արարքին  308-րդ հոդվածով որակում տալն ապօրինի է, սխալ: 

Հարցին՝ գործընթացները կապում են արդյոք  ՏԻՄ ընտրությունների արդյունքների հետ, փաստաբանն արձագանքեց՝ նշելով, որ քաղաքական հայտարարություններ չի ցանկանում կատարել, քաղաքականությամբ չի զբաղվում. «Որպես կանխավարկած՝ որոշակի չափով իմ կարծիքը հայտնում եմ Ձեզ, ենթադրությունը՝ թողնում եմ Ձեզ»:

Անդրադառնալով Հարությունյանի մասնակցությամբ քննչական գործողություններին՝ փաստաբանը տեղեկացրեց, որ այս ընթացքում բազմաթիվ քննչական գործողություններ են եղել, մեկ տարի երկու ամիս նրա նկատմամբ որպես խափանման միջոց է կիրառված եղել գրավը, այդ ընթացքում Հարությունյանը պատշաճ ներկայացել է քննչական գործողություններին, դրսևորել միայն օրինական վարքագիծ, որևէ ապօրինի գործողություն չի կատարել և կալանավորման միջնորդությամբ ևս չի որևէ փաստարկ չի ներկայացվել, որը կհիմնավորեր, որ իր պաշտպանյալը կարող է նույնիսկ նման նպատակ ունենալ:

«Այնպիսի անհիմն միջնորդություն է ներկայացվել դատարան, որը, մեր խորին համոզմամբ, իրավական տրամաբանության մեջ չէր կարող բավարարվել, առավել ևս՝ այդ միջնորդությունը դատարանը իրավունք չուներ քննել, քանի որ քննիչն իրենից խնդրում էր մի բան, որի կատարման լիազորությունն ինքը չուներ՝ կոնկրետ գրավի մասով, բայց, արի ու տես, որ այսօր ունենք դատավոր, որն ի վիճակի է նման որոշումներ կայացնելու և չղեկավարվել ՀՀ քրդատօրենսգրքով, գուցե ուրիշ օրենսգրքով է նա ղեկավարվել, դա չեմ կարող ասել »,- ընդգծեց Բակուր Օհանյանը:

Փաստաբանը հայտնեց նաև, որ Արամ Հարությունյանն առաջադրված մեղադրանքը չի ընդունում՝ ամբողջ ծավալով, մեղադրանքը չի ընդունել ի սկզբանե, իսկ թե արդյոք կան Հարությունյանի դեմ ցուցմունք տված անձինք, արդյոք առերեսում եղել է, թե ոչ՝ փաստաբանը, նախաքննության գաղտնիությունից ելնելով մանրամասներ չհայտնեց, միայն վստահեցրեց, որ Հարությունյանի նկատմամբ իրականացվող քրեական հետապնդումն անհիմն է:

Հեղինակ՝ Իզաբել Սահակյան

Աղբյուր` Փաստինֆո