Փաստ ինֆո

ԱԺ նախագահ Ալեն Սիմոնյանին անվստահություն հայտնելու համար ընդդիմադիրների ստորագրահավաք կազմակերպելու մասին տեղեկատվությունը ոչ միայն սխալ է, այլ նաեւ հակասում է ՀՀ ԱԺ կանոնակարգ օրենքին։ Այդ մասին «Փաստինֆո»-ի հետ զրույցում նշել է ԱԺ «Պատիվ ունեմ» խմբակցության քարտուղար Հայկ Մամիջանյանը։

Նշենք, որ մամուլում տեղեկություն էր տարածվել, թե «Հայաստան» խմբակցությունն Ալեն Սիմոնյանին անվստահություն հայտնելու նախաձեռնությամբ է հանդես եկել, սակայն ստորագրահավաքին չեն մասնակցել Արթուր Վանեցյանը, Թագուհի Թովմասյանը և արդեն անկախ պատգամավոր Իշխան Զաքարյանը, իսկ «Պատիվ ունեմ» խմբակցության հանրապետական պատգամավորները ստորագրել են։ Հ.Մամիջանյանի արձանագրմամբ՝ սա սխալ տեղեկություն է. ԱԺ նախագահին անվստահություն հայտնում են ոչ թե պատգամավորի ստորագրությամբ, այլ խմբակցությունների որոշումներով։

««Հայաստան» խմբակցությունը նախաձեռնել և արդեն մուտք է արել իրենց խմբակցության որոշումը։ Մենք այդ հարցը քննարկել ենք և ամենայն հավանականությամբ երկուշաբթի նմանօրինակ փաստաթուղթ մուտք կանենք նաեւ մեր խմբակցությամբ։ Այստեղ որևէ մեկի միասնականության կամ ոչ միասնականության խնդիր չկա»,-ասաց Հայկ Մամիջանյանը։

Հիշեցնենք, որ օրերս համացանցում տարածվել էր ԱԺ նախագահ Ալեն Սիմոնյանի մասնակցությամբ տեսանյութ, որտեղ նա մեղադրում է Բաքվում գտնվող հայ ռազմագերիներին՝ զենքը վայր դնելու և թշնամուն հանձնվելու մեջ. «Էդ գերիներին համարում եմ, որ արդեն իրանք չկան, իմ համար չկան»,-ձայնագրության մեջ ասում է Ալեն Սիմոնյանը: Այս դեպքից հետո ԱԺ ընդդիմադիր պատգամավորները հայտարարեցին, որ Ալեն Սիմոնյանին անվստահություն հայտնելու հարց կբարձրացնեն։

Աղբյուր` Փաստինֆո