Փաստ ինֆո

Հայ ռազմագերիների շահերը ՄԻԵԴ-ում ներկայացնող իրավապաշտպան Սիրանուշ Սահակյանն այսօր ռազմագերիների իրավուքների պաշտպանությանը նվիրված քննարկմանը հայտնել է, շատ է շահարկվում Խծաբերդի դրվագը։ Իրավապաշտպանը դատապարտել է Խծաբերդից գերեվարված զինծառայողներին պիտակավորելու, նրանց ցուցմունքները փաստաբանի կողմից հրապարակելու փաստը։

Հարցաքննությունների հետ կապված կան պայմաններ, որոնք պետք է բավարարվեին։ Վերադարձած գերիները բոլորը հարցաքննվել են վկայի կարգավիճակով։

«Հարցաքննությունների հետ կապված կան պայմաններ, որոնք պետք է բավարարվեն։ Նրանք բոլորը հարցաքննվել են վկայի կարգավիճակով, կարևոր էր քննարկել նաև այն հարցը, թե ադրբեջանական գերության և մշտապես կյանքի սպառնալիքի ներքո գտնվող անձանց նման հոգեբանական և ֆիզիկական վիճակով թույլատրելի՞ էր կանչել հարցաքննության»,- ասաց Սահակյանը։

Նաիրա Զոհրաբյանը հավելեց, որ նրանք անմիջապես ինքնաթիռից իջնելուց հետո կանչվել են ԱԱԾ և ութ ժամ հարցաքննվել։

Իրավապաշտպանը հայտարարեց, որ իրենք Խծաբերդից զինծառայողների գերեվարման հանգամանքների առնչությամբ հստակ հարցադրումներ ունեն պետությանը, նաև հանգամանքների են տիրապետում, որոնք կոնկրետ եզրահանգումների տեղիք են տալիս։

«Ինչպե՞ս պատահեց, որ երբ նոյեմբերի 9-ի հայտարարությամբ յուրաքանչյուր կողմ մնում էր այն դիրքերում, որտեղ գտնվում էր, իսկ Խծաբերդը և Հին Թաղերը բոլոր քարտեզների համապատասխան, մնացել են հայկական վերահսկողության ներքո, ստորագրվեց փաստաթուղթ և տրվեց հրահանգավորում, որով դրանք դարձան ադրբեջանական տարածքներ։ Երկրորդը՝ եթե այդ զինծառայողները պետք է շարունակեին մարտական խնդիրներ լուծել և նրանց հրահանգավորում էր տրվել իջնել դիրքերից, ո՞ր ստորաբաժանումներն են նրանց փոխարինել։ Եթե փոխարինող ստորաբաժանումներ չկային, ովքե՞ր են դրա պատասխանատուն։

Այսինքն, եթե ակնկալիք են ձևավորում, որ այդ տղաները պետք է մարտի բռնվեին, առնվազն պետք է հիմնավորումներ ներկայացնեն, թե մարտական հերթապահության կամ ծառայության նպատակահարմարությունն այդտեղ եղե՞լ է, հերթափոխ կազմակերպվե՞լ է, թե ոչ։ Կուզենայինք նաև հասկանալ, թե ինչպե՞ս է պատահել, որ նույն հրամանատարը, առանց փամփուշտ արձակելու, ադրբեջանցիների հետ խոսակցության արդյունքում լքել է տեղանքը, և եթե մարտերը պետք է շարունակվեին, ինչո՞ւ մարտի չէին բռնվում, մեկ փամուշտ էլ ինքն արձակեր։ Այս ցանկը կարող ենք ընդլայնել, պարզապես խորհուրդ կտանք, որ զգոնություն ունենան և անհարկի այս խմբի զինծառայողներին չպիտակավորեն», - նշեց իրավապաշտպանը, հավելելով՝ խնդիրը շատ ավելի լուրջ է և խորքային։

«Նշված միջադեպում մենք չենք տեսնում գերի հանձնվելու, գերի ընկնելու որևէ հատկանիշ։ Ավելին, գերիներով տարածք հանձնելու խնդիր ենք տեսնում, և հենց այս փաստերն են, որ պետք է ավելի ուշադիր հետաքննության արժանան»,- հայտարարեց իրավապաշտպանը։

Աղբյուր` Փաստինֆո