Փաստ ինֆո

«Սասնա Ծռեր 1» գործով ամբաստանյալ Արմեն Բիլյանը մեղավոր ճանաչվեց՝ ոստիկանության ծառայող Գագիկ Մկրտչյանի սպանության համար և դատապարտվեց ազատազրկման՝ 25 տարի ժամկետով։

«Փաստինֆո»-ի թղթակցի հաղորդմամբ՝ Վերաքննիչ քրեական դատարանը՝ դատավոր Տիգրան Սահակյանի նախագահությամբ, կազմով՝ դատավորներ Արմեն Բեկթաշյանի և Ռուբիկ Մխիթարյանի, մասամբ բավարարեց դատախազի բողոքը, այն է՝ մասնակի բեկանեց «Սասնա Ծռեր 1» գործով Երեւանի ընդհանուր իրավասության դատարանի դատավճիռը՝ Արմեն Բիլյանին մեղավոր ճանաչելով նաև սպանության համար և վերջնական պատիժ սահմանելով ազատազրկումը՝ 25 տարի ժամկետով։ Մինչև դատավճիռը կմտնի օրինական ուժի մեջ՝ Արմեն Բիլյանի նկատմամբ որպես խափանման միջոց կկիրառվի կալանավորումը, վերջինս կալանավորվեց հենց դատական նիստերի դահլիճում։

Մյուս ամբաստանյալների մասով դատավճիռը մնաց անփոփոխ։ Վերաքննիչ դատարանը մերժեց դատավճռի դեմ պաշտպանների բողոքը։

Բիլյանի վերաբերյալ դատավճռի հրապարակումը բուռն արձագանք ստացավ ամբաստանյալների, պաշտպանների շրջանում։ Բիլյանը հայտարարեց, որ մարտական է տրամադրված, տրամադրությունը՝ բարձր է, ավելին՝ Գագիկ Մկրտչյանի արյունը մեղադրեց կեղծիքի մեջ։ Պաշտպան Զարուհի Փոստանջյանն էլ հայտարարեց, որ Գագիկ Մկրտչյանին Բիլյանը ոչ մի մարմնական վնասվածք չի պատճառել։

«Դա Դուք էլ շատ լավ գիտեք։ Վաղը մյուս օր հանդիպելու եք Ձեր ամուսնու հետ»,- հայտարարեց Փոստանջյանը, ինչին ի պատասխան Գագիկ Մկրտչյանի այրին ասաց, որ արդարացման դատական ակտը շատ անարդար էր։

Հիշեցնենք, որ Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, հունիսի 24-ին հրապարակել է «Սասնա ծռեր» գործով դատավճիռը, համաձայն որի՝ Արայիկ Խանդոյանի նկատմամբ քրեական հետապնդումը դադարեցվել է՝ մահվան հիմքով, Պավել Մանուկյանը մեղավոր է ճանաչվել՝ դատապարտվելով ազատազրկման՝ 7 տարի 8 ամիս ժամկետով, Վարուժան Ավետիսյանը՝ 7 տարի 4 ամիս, Մխիթար Ավետիսյանը 7, 5, Էդվարդ Գրիգորյանը՝ ՝6,5 տարի, Գագիկ Եղիազարյանը՝ 7 տարի 5 ամիս, Արեգ Կյուրեղյանը՝ 7 տարի 1 ամիս, Սեդրակ Նազարյանը՝ 8 տարի 2 ամիս ժամկետով։

Նշենք, որ երկու ոստիկանի՝ Յուրի Տեփանոսյանի և Արթուր Վանոյանի սպանության մեջ մեղադրվող Սմբատ Բարսեղյանը, որի համար դատախազը պահանջել էր ցմահ ազատազրկում, դատապարտվել է ազատազրկման՝ 25 տարի ժամկետով, իսկ Արմեն Բիլյանը, որին մեղսագրվում էր ոստիկանության ծառայող Գագիկ Մկրտչյանի սպանությունը, Երեւանի ընդհանուր իրավասության դատարանի կողմից արդարացվել էր ու ճանաչվել անպարտ։

Բիլյանը մեղավոր է ճանաչվել ՀՀ ՔՕ 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 177-րդ հոդվածի 3-րդ մասի 1-ին և 2-րդ կետերով նախատեսված հանցագործությունների կատարման մեջ՝ կազմակերպված խմբի կողմից զենք-զինամթերք պահելու, կրելու, պատանդ վերցնելու, հրազեն հափշտակելու, շորթելու եւ առանձնապես խոշոր չափերով գողություն կատարելու համար ։ Նա դատապարտվել էր ազատազրկման՝ 4 տարի 11 ամիս ժամկետով ու ազատ արձակվել նիստերի դահլիճից՝ մինչև դատավճռի օրինական ուժի մեջ մտնելը նրա նկատմամբ որպես խափանման միջոց կիրառելով չհեռանալու մասին ստորագրությունը։

Հեղինակ՝ Իզաբել Սահակյան

Աղբյուր` Փաստինֆո