Փաստ ինֆո

ԱԺ «Հայաստան» խմբակցության պատգամավոր Արմեն Չարչյանն ազատ արձակվեց։ Երևանի ընդհանուր իրավասության դատարանը՝ դատավոր Վահե Միսակյանի նախագահությամբ, որոշեց Արմեն Չարչյանի նկատմամբ որպես խափանման միջոց կալանավորումը փոփոխել և նրա նկատմամբ որպես խափանման միջոց ընտրել՝ ստորագրությունը՝ չհեռանալու մասին։

Նշենք, որ ՍԴ-ն բավարարել է ԱԺ ընդդիմադիր խմբակցության պատգամավորների դիմումը՝ արձանագրելով, որ անազատության մեջ գտնվող պատգամավորի կարգավիճակ չունեցող անձը պատգամավորի կարգավիճակ ձեռք բերելու պահից, չի կարող պահվել անազատության մեջ։ ՍԴ որոշումից հետո Երևանի ընդհանուր իրավասության դատարանը՝ դատավոր Վահե Միսակյանի նախագահությամբ, հրատապ նիստ է հրավիրել՝ Արմեն Չարչյանի խափանման միջոցի հարցը քննության առարկա դարձնելու համար։

Հիշեցնենք, որ տելեգրամյան մի ալիքում հրապարակվել էր ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։ Չարչյանը նշել է, որ եթե որևէ մեկը չմասնակցի ընտրություններին, ապա կիմանա այդ մասին։

Ձայնագրության հրապարակումից հետո հաշված ժամերի ընթացքում ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով, որի շրջանակներում նախ բերման են ենթարկել Չարչյանին և տեղափոխել ՀՔԾ, ապա ձերբակալելու որոշում կայացրել։

Պաշտպանները բողոք են ներկայացրել Չարչյանին ձերբակալելու մասին որոշման դեմ, ինչը բավարարվել է քվեարկության օրը և նա դատարանի որոշմամբ ազատ էր արձակվել։

Հունիսի 21-ին դատախազությունը հաղորդագրություն տարածեց՝ նշելով, որ ԿԸՀ-ն բավարարել է պատգամավորի թեկնածու Արմեն Չարչյանի նկատմամբ հետապնդում իրականացնելու և նրան ազատությունից զրկելու համաձայնություն տալու վերաբերյալ միջնորդությունները եւ  ՀՔԾ-ն Արմեն Չարչյանին մեղադրանք է առաջադրել ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով։ Նրա նկատմամբ կալանավորումը որպես խափանման միջոց ընտրելու մասին միջնորդություն էր ներկայացվել դատարան, որը մասամբ բավարարվել էր դատավոր Արմինե Մելիքսեթյանի կողմից։

Քրեական գործով նախաքննությունն ավարտվել է եւ գործն այժմ գտնվում է դատավոր Վահե Միսակյանի վարույթում, որը նրա նկատմամբ դատաքննության փուլում գրավ կիրառելու որոշում էր կայացրել՝ ազատելով կալանքից, սակայն դատախազությունը ներկայացրել էր վերաքննիչ բողոք ու վերաքննիչ դատարանը՝ Ռ. Մխիթարյանի նախագահությամբ, ԱԺ պատգամավոր Չարչյանին կրկին կալանավորելու որոշում կայացրեց՝ պատգամավորական անձեռնմխելիություն ունենալու պայմաններում։

Հեղինակ՝ Իզաբել Սահակյան

Աղբյուր` Փաստինֆո