Փաստ ինֆո

Թշնամին այսօր հերթական անգամ սադրանքի է դիմել Արցախի հատվածում՝ կրակելով Մարտունու շրջանի Մաճկալաշեն համայնքում գյուղատնտեսական աշխատանքներով զբաղվող բնակիչների ուղղությամբ:

«Փաստինֆո»-ի հետ զրույցում Արցախի ԱԺ պատգամավոր Մետաքսե Հակոբյանը մանրամասնեց, որ թշնամին կրակ է արձակել տարբեր ուղղություններով, որտեղ բնակիչներն աշխատանք են կատարել, տուժածներ, վիրավորներ չկան.

«Հիմա եղանակն Արցախում տաք է, մարդիկ աշխատանքներ են անում, որ ուղղությամբ շարժ եղել է՝ այդ ուղղությամբ կրակել են: Այնտեղ հիմա նաև ջրագիծ են կառուցում, իսկ թշնամու հիմնական թիրախը եղել է ջրագծի կառուցումը թույլ չտալը: Մենք ականատես ենք եղել, որ իրենք առաջին անգամ վախեցնում են, երկրորդ անգամ վնասում, երրորդ անգամ՝ սպանում»,-ասաց Հակոբյանը:

Ըստ պատգամավորի՝ թշնամու նպատակը Արցախը հայաթափելն է, որպեսզի բնակիչներն այլևս հնարավորության չունենան գյուղատնտեսական աշխատանքներով զբաղվել և, ապրուստի միջոց չունենալով, լքեն իրենց բնակավայրերը.

«Այս կերպ ուզում են այնպես անել, որ մարդիկ վախից տներից դուրս չգան, եթե գյուղացին աշխատանք չանի, էլ գյուղում ապրում է, ի՞նչ անի, այն էլ՝ վտանգված գյուղում, ինքը մտածելու է՝ ո՞նց փախչի գյուղից, սա կոնկրետ քաղաքականություն է, որ վարվում է Ադրբեջան կողմից»,,-ասաց Հակոբյանը:

Նա նաև շեշտեց, որ բազմիցս ահազանգել են Մաճկալաշենում առկա անվտանգային խնդիրների մասին, սակայն Արցախի իշխանություն այդպես էլ չի արձագանքել.

«Նույնիսկ մեր հորդորով այնտեղ դատախազը գնաց, և ինքն էլ ասաց, որ այնտեղ շատ խնդիրներ կան, բայց միևնույնն է՝ իշխանությունները լուռ են, իրենց բացարձակ չի հետաքրքրում: Այս ընթացքում Արայիկ Հարությունյանը մի անգամ գնաց, հուշարձան դրեց, շոու արեց ու եկավ, կարծես՝ դրանով մարդկանց անվտանգություն էր ապահովելու»,-ասաց Հակոբյանը:

Աղբյուր` Փաստինֆո