Փաստ ինֆո

ՀՀ «Քաղաքացիական օրենսգրքում» և հարակից օրենքներում փոփոխություններ կիրականացվեն։ Գործադիրն այսօրվա նիստում հավանություն տվեց օրենսդրական փաթեթին։

ՀՀ արդարադատության նախարար Կարեն Անդրեասյանը նշեց, որ առաջարկվող կարգավորումների նպատակն ինքնակամ շինարարության դեմ պայքարում առավել արդյունավետ իրավական մեխանիզմների նախատեսումն է։

«Ինքնակամ շինարարությունների գործընթացը տարիներ շարունակ բավարար չափով չի կարգավորվել, ինչի հետևանքով աղճատվել է բազմաթիվ քաղաքներում քաղաքաշինական պատկերը, և անվտանգության հետ կապված խնդիրներ են ծագել։ Այս նախաձեռնությամբ մի գիծ է քաշվելու, որից հետո ինքնակամ կառույցներն այլևս չեն օրինականացվելու»,-նշեց նախարարը։

Կարեն Անդրեասյանը պարզաբանեց՝ քանի որ կառավարությունը նպատակ չունի այնպես անել, որ արդեն կառուցված ինքնակամ շինությունները քանդվեն, մշակվել է հստակ մեխանիզմ, թե ինչպես են օրիանակացվելու մինչ այս օրենքի ընդունման պահը կառուցված ինքնակամ շինությունները։

«Ըստ այդ մեխանիզմի՝ հատկապես արագ պետք է քայլեր ձեռնարկեն այն քաղաքացիները, որոնք ինքնակամ շինություններ են կառուցել 2021թ.-ի հունվարի 1-ից սկսած։ Այդ քաղաքացիներին տրվելու է երկամսյա ժամկետ, որ կադաստրի կոմիտեում ներկայացնեն համապատասխան պահանջվող փաստաթղթերը, որն օրենքի ուժի մեջ մտնելուց հետո կառավարությունը հստակ կսահմանի։ Երևանի վարչական սահմաններում կառուցված ինքնակամների համար տրված է մինչև 2023թ.-ի հունվարի 1-ը, որ հաշվառվեն։ Այն տեղերում, որտեղ միայն գյուղական բնակավայրեր են, մինչև 2025 թվականի հունվարի 1-ը»,-ասաց Կարեն Անդրեասյանը։

Վերջինս նշեց, որ այսուհետ ավելի խիստ պատիժներ ու սանկցիաներ կլինեն այն համայնքապետերի նկատմամբ, որոնք չեն իրագործի տեսչական մարմինների պահանջները՝ կասեցնելու ապօրինի շինարարությունները, չեն ապամոնտաժի ու չեն ազատի համայնքային հողերը նման շինություններից։

ՀՀ վարչապետ Նիկոլ Փաշինյանը նշեց, որ կադաստրի կոմիտեն բավական լավ տեմպերով իրականացնում է Հայաստանի բնակավայրերի օդային լուսանկարահանումներ, և 2021թ.-ի դրությամբ հասանելի կլինի բոլոր շինությունների մասին տեղեկություններ։

«Մենք չենք կարող ասել, որ գոյություն ունեցող ապօրինի շինությունները քանդվում են, պետք է որոշակի ժամանակ թողնենք։ Խնդիր ունեինք մի պահ ֆիքսել, որ սրանք են ՀՀ-ում գոյություն ունեցող կառույցները և այլևս որևէ կառույցի ի հայտ գալը կարող ենք արձանագրել, որ դա գոյություն է ունեցել այս հնարավորությունը ստեղծելուց հետո»,-ասաց վարչապետը։

Աղբյուր` Փաստինֆո