Փաստ ինֆո

Խծաբերդի և Հին Թաղերի հարցն արտաքին քաղաքական օրակարգում որևէ տեղ չի գտնվում։ Լրագրողների հետ զրույցի ժամանակ ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը։

«Տեսե՞լ եք որևէ հանդիպում, որտեղ Հայաստանը կբարձրաձայնի այս երկու գյուղերի հարցը, կհայտարարի, որ այս գյուղերն Ադրբեջանն ապօրինի ձևով բռնազավթել է նոյեմբերի 9-ի փաստաթղթի ստորագրումից հետո և դրանք պետք է անհապաղ վերադարձվեն։ Չկա նման բան»,-նշեց պատգամավորը։

Տիգրան Աբրահամյանի խոսքով իշխանությունը փորձում է քողարկել այն, որ նոյեմբերի 9-ից հետո տրվել են տարածքներ, որոնք այս իշխանությունը որևէ ձևով իրավունք չուներ հանձնել։ Դրանք այս կամ այն օղակի զինծառայողների վրա բարդելը տրամաբանական չէ։

«Իշխանության համար կա ցանկ, որտեղ ներառված են տարբեր բնույթի զինվորականներ, քաղաքական գործիչներ և ըստ նպատակահարմարության դրանք օգտագործում է։ Եղել են դրվագներ, որ իշխանությունը հայտարարել է, թե այսինչն այս ճակատից փախել է, քրեական գործ է հարուցվում, մեկ էլ կարճվում է։ Այսինքն պարզվում է, որ Նիկոլ Փաշինյանն ապատեղեկատվություն է տարածել։ Պետք է ակնկալել, որ 44-օրյա պատերազմին առնչվող, դրան հետևած գործընթացներն այս իշխանության կողմից լայն ձևով օգտագործվելու են, ապօրինություններ են տեղի ունենալու նախապես նշանակված այսպես կոչված մեղադրյալների նկատմամբ և այս իրավիճակում ակնկալել, որ Նիկոլ Փաշինյանն ԱԺ ամբիոնից կամ մեկ այլ հարթակից օբյեկտիվ քննության մասին կներկայացներ, տրամաբանական չէր»,-ասաց Տիգրան Աբրահամյանը։

Աղբյուր` Փաստինֆո