Փաստ ինֆո

Խորհրդարանում այսօր քննարկվեց կառավարության կողմից ներկայացված «Պետական ոչ առևտրային կազմակերպությունների մասին» օրենքում փոփոխություններ կատարելու մասին օրենքի նախագիծը, որով փոփոխություններ են նախատեսվում ՊՈԱԿ-ների ղեկավար նշանակվելու պահանջներում:

Ըստ նախագծի՝ Պետական ոչ առևտրային կազմակերպության(ՊՈԱԿ) գործադիր մարմնի պաշտոնում կարող է նշանակվել ՀՀ այն բարձրագույն կրթություն ունեցող գործունակ չափահաս քաղաքացին, որը ունի հանրային ծառայության առնվազն չորս տարվա ստաժ կամ առնվազն հինգ տարվա մասնագիտական աշխատանքային ստաժ կամ համապատասխան բնագավառի առնվազն երեք տարվա աշխատանքային ստաժ, եթե օրենքով այլ բան նախատեսված չէ։

Ընդդիմությունը դեմ արտահայտվեց նախագծին:

Մասնավորապես, «Պատիվ ունեմ»-ից Աննա Մկրտչյանը համոզմունք հայտնեց, որ նախագծի նպատակն է իջեցնել ղեկավար պաշտոններում պաշտոնավարման իրավունքի ցենզերը.

«Այսինքն՝ հնարավարություն տալ ոչ մասնագիտական ունակություններ ունեցող անձանց զբաղեցնելու կոնկրետ պաշտոններ»:

«Հայաստան» խմբակցությունից Աղվան Վարդանյանն էլ պնդեց, որ խոսքն ամենևին տեխնիկական փոփոխությունների մասին չէ.

«Օրենքի նախագիծը, չգիտես ինչու, բերել է Շրջակա միջավայրի նախարարությունը, տրամաբանական կլիներ, որ ՊՈԱԿների-ի մասին նախագիծը ներկայացներ Արդարադատության նախարարությունը, կարծում եմ՝ ենթատեքստը հասկանալի է»:

Ըստ Աղվան Վարդանյանի՝ օրենքի նախագիծը ենթադրում է՝ ցանկացած մեկը, որը աշխատանքային համապատասխան փորձ չունի, կարող է նշանակվել ՊՈԱԿ-ի տնօրեն:

Աղբյուր` Փաստինֆո