Փաստ ինֆո

Մեղրիի նախկին համայնքապետ, ԱԺ պատգամավոր Մխիթար Զաքարյանի և մյուսների գործով նախագահող դատավոր, Սյունիքի մարզի ընդհանուր իրավասության դատարանի նախագահ Նապոլեոն Օհանյանն ինքնաբացարկ է հայտնել՝ բավարարելով մեղադրող դատախազի միջնորդությունը։

Նշենք, որ դատավոր Նապոլեոն Օհանյանի վարույթում քրեական գործը գտնվում էր սեպտեմբեր ամսից, այս ընթացքում արդեն իսկ հետազոտվել են քրեական գործում առկա ապացույցները, դատարանը պետք է անցներ դատական վիճաբանության փուլին, սակայն մեղադրող կողմը օպերատիվ տեղեկություններ է ստացել ինքնաբացարկի հիմքերի մասին և դեկտեմբերի 7-ին կայացած դատական նիստի ընթացքում ներկայացրել դատավորին՝ ինքնաբացարկի միջնորդություն։ Մասնավորապես, Արմեն Օսեյանը դատարանում հայտնել է, որ դեկտեմբերի 6-ին ՀՀ ոստիկանությունից օպերատիվ տվյալներ են ստացել, որի համաձայն՝ Զաքարյանն ունի ընկերական հարաբերություններ Մերուժան Սիմոնյանի հետ, ում միջոցով տարիներ առաջ ծանոթացել և ներկայումս մտերիմ ընկերական հարաբերությունների մեջ է գտնվում Սյունիքի մարզի ընդհանուր իրավասության դատարանի նախկին նախագահ Սամվել Գրիգորյանի և ներկայիս նախագահ Նապոլեոն Օհանյանի հետ և. ըստ տեղեկությունների, հնարավոր է, որ սույն քրեական գործով վերջինս դրսևորի կողմնակալ վերաբերմունք, հետևաբար, ողջամիտ կասկած է առաջանում դատարանի անկողմնակալության մեջ։

Պաշտպանության կողմն ու ամբաստանյալներն առարկել են միջնորդության դեմ։ Դատավոր Նապոլեոն Օհանյանը բավարարել է ինքնաբացարկի միջնորդությունը՝ չհերքելով, որ Մերուժան Սիմոնյանն իր մտերիմ ընկերն է, իսկ Սամվել Գրիգորյանի հետ ունեցել է աշխատանքային հարաբերություններ, քանի որ Գրիգորյանը 2008-2021թթ եղել է Սյունիքի մարզի ընդհանուր իրավասության դատարանի նախագահ։ Դատավոր Օհանյանը նաև արձանագրել է, որ, թեև Մերուժան Սիմոնյանն ու Մխիթար Զաքարյանը ընկերներ են, բայց ինքն անձամբ Զաքարյանի հետ մտերիմ կամ ընկերական հարաբերություններ չունի և նշված հանգամանքն իրեն չի կարող կաշկանդել՝ օբյեկտիվ և արդար քննություն կատարելու համար, ավելին՝ դրան ուշադրություն չի դարձրել, քանի որ իր երկար տարիների աշխատանքային փորձով և Սյունիքի մարզի առանձնահատկություններով, մասնավորապես, բնակչության սակավությամբ պայմանավորված՝ նման իրավիճակ կարող է ստեղծվել բազմաթիվ գործերով, ինչի կապակցությամբ էլ դատաքննության նախապատրաստման փուլում ինքնաբացարկ չի հայտնել։

Բացի այդ՝ դատավոր Օհանյանն ընդգծել է, որ ինչպես սույն գործով, այնպես էլ՝ որևէ այլ քրեական գործի քննությամբ երբևէ կանխակալ վերաբերմունք չի ունեցել։

«Պետք է փաստեմ, որ սույն դեպքում իմ կողմից ինքնաբացարկի հիմքերի առկայության դեպքում ինքնաբացարկ չհայտնելը կարող է բացասական անդրադառնալ հանրության կողմից դատական իշխանության անաչառության եւ անկախության ընկալման վրա»,- նշել է դատավորը՝ բավարարելով դատախազի միջնորդությունը։

Դատավոր Օհանյանի կողմից ինքնաբացարկ հայտնելուց հետո քրեական գործը երեկ մակագրվել է Սյունիքի մարզի ընդհանուր իրավասության դատարանի դատավոր Գնել Գասպարյանին։

Հիշեցնենք, որ սույն քրեական գործով մեղադրյալի կարգավիճակում են Մեղրիի նախկին համայնքապետ, ԱԺ ընտրված պատգամավոր Մխիթար Զաքարյանը, փոխհամայնքապետ Արմեն Սամվելյանը և համայնքապետարանի աշխատակից Արտավազդ Արզումանյանը։ Քրեական գործը վերաբերում է պաշտոնեական լիազորությունների չարաշահմանը։

Նշենք, որ Մ.Զաքարյանը կալանավորվել է առանց պատգամավորական անձեռնմխելիությունից զրկվելու, ինչը ՀՀ ՍԴ-ի այսօրվա որոշման համաձայն ապօրինի է, հետեւապես նա պետք է անհապաղ ազատ արձակվի։

Հեղինակ՝ Իզաբել Սահակյան

Աղբյուր` Փաստինֆո