Փաստ ինֆո

Խորհրդարանն այսօրվա նիստում քննարկեց 2022թ-ի պետական բյուջեի մասին օրենքի նախագիծը:

ՀՀ ֆինանսների նախարար Տիգրան Խաչատրյանը նախագծի քննարկման ժամանակ հայտարարեց, որ լրամշակված նախագիծը «Պետական բյուջեի մասին» օրենքի հատվածում նախատեսում են 1 տրիլիոն 947.8 միլիարդ դրամ եկամուտներ: Բյուջեի ծախսերը կազմում են 2 տրիլիոն 184 միլիարդ դրամ, իսկ դեֆիցիտը՝ 236.2 միլիարդ դրամ.

«Բացի նշված ծախսերը՝ 2022 թվական պետական բյուջեի առաջնահերթությունների հավելվածում ներառված են նաև 85 միլիարդ 556 միլիոն դրամ ընդհանուր արժեքով լրացուցիչ միջոցառումներ, որոնք կարող են իրականացվել, եթե բյուջեի եկամուտները գերազանցեն նախագծով սահմանված չափը կամ նախատեսված ծախսային միջոցառումների մի մասն իրականացվեն սահմանվածից որոշակի պակաս արժեքով»,-ասաց Խաչատրյանը:

Նախարարի խոսքով՝ բյուջեի եկամուտների գծով ավելացումները կազմել են 1 մլրդ 548.3 մլն դրամ, որից հարկային եկամուտներն ավելացել են 82.8 մլն դրամ՝ պայմանավորված վարկային նոր ծրագրերի ծավալին համապատասխան հաշվարկված լրացուցիչ հարկային եկամուտներով.

«Այլ եկամուտները նվազել են 42.8 մլրդ դրամով՝ պայմանավորված փոխարժեքային վերահաշվարկով, պաշտոնական դրամաշնորհներն ավելացել են 1 մլրդ 508.4 մլն դրամով: Փոփոխությունների արդյունքում պետական բյուջեի ծախսերը զուտ արժեքով նվազել են 5 մլրդ 187.9 մլն դրամով, իսկ բյուջեի եկամուտների և ծախսերի թվարկված փոփոխությունների արդյունքում պետբյուջեի դեֆիցիտը նվազել է 6 մլրդ 736.3 մլն դրամ չափով»,-ասաց նախարարը:

Նախարարն ընդգծեց, որ 2022 թվականի պետական բյուջեի նախագիծը ձևավորվել է կառավարության 2021-2026 թվականի ծրագրով սահմանված առաջնահերթություններին համահունչ` հատուկ կարևորելով անվտանգային հարցերի, կրթական համակագերի, ինչպես նաև՝ ներառական ու որակյալ ենթակառուցվածքների զարգացման հարցերի լուծումը:

Տիգրան Խաչատրյանը նաև հավելեց, որ 2022 թվականի պետական բյուջեի նախագիծը ձևավորվել է բարդ ժամանակահատվածում.

«Դեռևս ամբողջովին հաղթահարված չեն 2020 թվականին արձանագրված 2 մարտահրավերների՝ կորոնավիրուսի և Արցախյան պատերազմի անվտանգային, սոցիալական, տնտեսական հետևանքները»,-ասաց նա:

Աղբյուր` Փաստինֆո