Փաստ ինֆո

Վարչապետ Նիկոլ Փաշինյանն այսօր Ազգային ժողովում հայտարարեց, թե «Հայաստան» խմբակցությունն Ադրբեջանի շահերն է ներկայացնում: Մասնավորապես, ընդդիմադիր պատգամավոր Արթուր Ղազինյանն արձագանքելով Փաշինյանին, հայտնեց, որ «Զանգեզուրի միջանց» կոչվողը վտանգավոր է ՀՀ-ի համար ու կարող են լինել ճնշումներ։ Հարցրեց՝ եթե ճնշումները հասնեն այն աստիճանի, որ հնարավոր չլինի բանակցություններով խնդիրը կարգավորել և պատերազմի սպառնալիք լինի, գտակցելով պահի անվտանգային նշանակությունը պատրաստ կլինի՞ հրաժարվել իշխանությունից։ Ի պատասխան Փաշինյանը հետաքրքրվեց՝ ո՞վ է Ղազինյանը և ո՞ւմ է ներկայացնում դահլիճում, երբ խոսում է ադրբեջանական տերմինաբանությամբ։

«Ես ուզում եմ իմանալ, թե դուք ո՞վ եք ու ո՞ւմ եք ներկայացնում այս դահլիճում, երբ որ խոսում եք ադրբեջանական տերմինաբանությամբ», - ասաց Նիկոլ Փաշինյանը: Նրա խոսքով՝ Արթուր Ղազինյանն այսօր ներկայացնում է Ադրբեջանի Հանրապետությունը:

«Ինձ համար միշտ էլ հստակ է եղել, որ, այո, Հայաստանում կան ազդեցության ցանցեր ու հիմա մենք բոլորս ուղիղ եթերում տեսանք այսպիսի ցանցերից մեկի գործունեության արտահայտությունը, ես սրանում չեմ կասկածում: Դուք Ազգային ժողովի դահլիճում ադրբեջանական նարատիվ տարածողն եք, ու ես սա ուզում եմ, որ մենք շատ հստակ արձանագրենք», - ասաց ՀՀ վարչապետը:

Նա նշեց, թե «Հայաստան» խմբակցության առաքելությունը Հայաստանում օտար քաղաքական նարատիվներ զարգացնելն է:

«Ես խորհուդ եմ տալիս ձեզ դատի տալ ու մենք առիթ կունենանք դա ապացուցելու»,- ասաց Փաշինյանը:

Աղբյուր` Փաստինֆո