Փաստ ինֆո

Աբովյան համայնքում, որտեղ իշխող ՔՊ-ն պարտվել էր ԲՀԿ-ին, ձայների վերահաշվարկը սկանդալային միջադեպով է ուղեկցվել:

«Քաղաքացիական պայմանագիր» խմբակցության ղեկավար Հայկ Կոնջորյանի հարազատ եղբայրը՝ Ավետիս Կոնջորյանը, որն Աբովյան խոշորացված համայնքի ղեկավարի ՔՊ թեկնածու Պավել Ցուգունյանի շտաբի ղեկավարն է, մտել է ձայների վերահաշվարկի սենյակ, մեծ աղմուկ բարձրացրել և սպառնացել հանձնաժողովի անդամներին:

Միջադեպից հետո տվյալ տեղամասի հանձնաժողովի նախագահին է զանգահարել ԿԸՀ նախագահ Տիգրան Մուկուչյանը պահանջել՝ դադարեցնել ձայների վերահաշվարկը, սրա արդյունքում ՔՊ-ի երեք անվավեր թերթիկ վավեր է ճանաչվում:

«Երկու տեղով վերահաշվարկ ենք անում, օրվա ընթացքում մեր վստահված անձինք փոխանցեցին, որ անընդհատ փորձում են սադրել և իրավիճակը լարել: Արդեն օրվա երկրորդ կեսին, դահլիճներից մեկում, որտեղ վերահաշվարկ էր կատարվում, ՔՊ թեկնածու Պավել Ցուգունյանի շտաբի պետը, որն իրավունք չուներ մտնել դահլիճ, մտել է դահլիճ և հանձնաժողովի անդամներին մեղադրել է կողմնապահության մեջ, հանձնաժողովի նախագահին ասել է՝ հեսա ձեր շեֆը կզանգի, կասի՝ ոնց պետք է, այնպես էլ կանեք, որից հետո Տիգրան Մուկուչյանը զանգել է իրենց և վերահաշվարկը դադարեցրել է, ՔՊ երեք անվավեր թերթիկ էլ վավեր է ճանաչվել»,- «Փաստինֆո»-ի հետ զրույցում նշեց ԱԺ նախկին պատգամավոր Շաքե Իսայանը:

Նրա փոխանցմամբ՝ ՔՊ-ական թեկնածուի շտաբի ղեկավարը, որը սկանդալային միջադեպի հերոսն է, «Քաղաքացիական պայմանագիր» խմբակցության ղեկավար Հայկ Կոնջորյանի հարազատ եղբայրն է՝ Ավետիս Կոնջորյանը:

Արման Աբովյանն էլ մեկնաբանեց, որ քանի որ ՔՊ-ն ջախջախիչ պարտություն է կրել Աբովյանում, «ցնցումների մեջ է ընկել և փորձում է ձայների վերահաշվարկով ինչ-որ բան ապացուցել».

«Վերահաշվարկի ժամանակ իշխանության թվերը գնալով իջնում են, սա պատճառ դարձավ, որպեսզի ՔՊ-ն հիստերիայի մեջ ընկնի: Հաշվարկի ժամանակ ՔՊ-ական թեկնածու Պավել Ցուգունյանի շտաբի պետը, մտնում է հաշվարկի տեղ, մտնում է հանձնաժողովի անդամներից մեկի թևը ու ասում՝ հեսա քեզ շեֆերը կզանգեն, հետո աղմուկ է բարձրացնում, հիստերիկ շարժումներ է անում ,դրանից հետո, չգիտես ինչու, իշխանության անվավեր քվեաթերթիկները դառնում են անվավեր, փաստացի փորձում են այսպիսի քայլերով կասեցնել իրենց հերթական ջախջախիչ խայտառակությունը»,-ասաց Աբովյանը ևշեշտեց, որ վավեր ճանաչված այդ երեք թերթիկները ոչինչ չեն կարող փոխել, քանի որ ԲՀԿ-ն ձայների մեծ առավելություն ունի ՔՊ-ից.

«Խնդիրն այն է, որ մենք կռիվ ենք տալիս ՀՀ քաղաքու յուրաքանչյուր քվեի համար, ոչ ոք իրավունք չունի Հայաստանի քաղաքացու քվեն խեղաթյուրի ՝իր նեղ քաղաքական նպատակներով, շարունակաբար նվազում են, դրա համար էլ իրար պատեպատեն տալիս»,-ասաց Աբովյանը և հավելեց, որ ԲՀԿ-ն ուշադիր կհետևի գործընթացներին և ըստ այդմ հետևությունները կանի.

«Եթե խելքները գլուխները չհավաքեն, ապա օրենքի ամբողջ խստությամբ պատասխան են տալու»:

Աղբյուր` Փաստինֆո