Փաստ ինֆո

Ազգային Ժողովի նախագահ Ալեն Սիմոնյանի մասնակցությամբ համացանցում հայտնված տեսանյութից հետո երկրորդ օրն է` ոտքի են կանգնել գերեվարված, զոհված և անհետ կորած զինծառայողների հարազատները։ Այսօր նրանք հավաքվել են ԱԺ մուտքի մոտ։

Արսեն Ղուկասյանը հայտնել է, որ տարբեր խմբակցությունների պատգամավորներին հանդիպել են նիստը սկսվելուց առաջ։
«Պատգամավորներին ասել ենք՝ ձեր ղեկավարին ասեք, որ ինքը պատասխան է տալու»։
Ղուկասյանը նշել է, որ իրենց պետք է մոտենա Ալեն Սիմոնյանը։ Չնայած մի շարք իշխանական պատգամավորներ հայտնել են, որ Ալեն Սիմոնյանը դա նկատի չուներ, Ղուկասյանը նշեց՝ արտահայտությունը արել է Սիմոնյանը, նա էլ պետք է բացատրություն տա։

«Ինքը չի կարող գնահատական տալ, տեղյակ չի ինչ է եղել, թող գործը քննեն, նոր գնահատական տա։ Ես իր արտահայտությունից, որ մենք գերի չունենք, հասկանում եմ ոնց որ Ադրբեջանին մեսիջ անի, որ մեզ գերի պետք չեն, ինչ ուզում ես արա, այսինքն, ավտոմատ դառնում է Ադրբեջանի զակազչիկը՝ մեր երեխեքին այնտեղ ոչնչացնելու համար»։
Հիշեցնենք` համացանցում է հայտնվել ԱԺ նախագահ Ալեն Սիմոնյանի մասնակցությամբ գաղտնի նկարահանված մի տեսանյութ, որում ՀՀ ԱԺ նախագահը հայտարարում է` գերիների ծնողներն էլ գիտեն, որ իրենց որդիները դասալքություն են արել և որ իր համար գերիներ չկան։

Ավելի ուշ Ալեն Սիմոնյանը մեկնաբանեց, որ տեսանյութը մոնտաժված է ու իր խոսքը կիսատ է ներկայացված։ Այդուհանդերձ, նա վերահաստատեց` բոլոր այն զինծառայողները, որոնք վայր են դրել զենքն ու հանձնվել են գերության, կենթարկվեն քրեական հետապնդման։

Այս տեսանյութի տարածվելուց հետո անհետ կորածների և գերիների ծնողներն ու հարազատները բողոքի ակցիա իրականացրեցին կառավարության շենքի դիմաց։ Պահանջում էին ԱԺ նախագահից գալ և պատասխան տալ գերիներին դասալիք անվանելու համար, սակայն հանդիպում տեղի չունեցավ և հարազատները մի քանի ժամ շարունակ փակ պահեցին Հրապարակ տանող փողոցները։

Միաժամանակ Շիրակի մարզպետարանի դիմաց բողոքի ակցիա էին իրականացնում նաև Շիրակի մարզից գերեվարված զինծառայողների հարազատները։ Նրանք փակել էին մարզպետարանի դիմացի փողոցները և պահանջում են անհապաղ հանդիպում Շիրակի մարզպետ Նազելի Բաղդասարյանի հետ։ Բողոքի ակցիայի մասնակիցները հայտնել էին, որ չեն պատրաստվում հեռանալ այստեղից, քանի դեռ չեն հանդիպել մարզպետին։

Աղբյուր` Փաստինֆո