Փաստ ինֆո

«Տղաներից երեք հոգու խաբել են, փորձել պայմաններ ստեղծել, որ սուր անկյուն չլինի, սարքել են ծեծ, 20 հոգով հարձակվել նրանց վրա»,- ԱԺ «Հայաստան» խմբակցության պատգամավոր Արամ Վարդևանյանն այսօր խորհրդարանում տեղի ունեցած ծեծկռտուքի մասին մարմասներ է ներկայացրել։

Պատգամավորը տեղեկացրել է, որ ԱԺ «Հայաստան» խմբակցության պատգամավորների օգնականներն ու փորձագետները 2-2։30-ին ունեցել են բանավեճ իշխող ուժի երկու պատգամավորների հետ։ Ըստ Վարդևանյանի, ոչ հաճելի պահ է եղել Սիսակ Գաբրիելյանի և Հրաչյա Հակոբյանի հետ, որն ամբողջությամբ հարթվել էր։

«Ձեռք էին սեղմել ու անցել առաջ։ Դրանից կարճ ժամանակ անց, մեր գործընկերներից Սևակին հրավիրում են սուրճ խմելու։ Կարծես թե հրավիրողը ԱԺ նախագահի տեղակալի օգնականն էր։ Սևակն արձագանքում է։ Խոսակցությունը գնում է այնպես, որ կարծես եկեք հարցը լուծենք, որ սուր անկյուններ չլինեն։ Զուգահեռաբար սուրճ խմելու են հրավիրում Գերասիմին։ Նրանց միանում է նաև Տարոնը։ Սուրճը չի լինում բնականաբար, որովհետև խոսքը գնում է նախապես պլանավորած գործողությունների մասին»։

Վարդևանյանը նշեց, որ բակերում տարիներ առաջ կիրառվող կոմիբինացիան այսօր ԱԺ-ում կիրառվել է իշխանության կողմից։

«Երեքին հրավիրելուց հետո մեկ էլ ներխուժում են 20 հոգի, նրանց մեջ մի շարք պատգամավորներ ու սկսում են հարվածել տղաներին։ Ընդհուպ մինչև դռան հետևն են եղել սպասելուց և շատ սինքրոնիզացված այդ գործողությունները կատարել են»։

Վարդևանյանը հայտնել է, որ պատգամավորների անունները չի կարող ասել, բայց նույն այն անձինք, որոնք խուլիգանական վարքագիծ էին դրսևորել ԱԺ նիստերի դահլիճում մի քանի ամիս առաջ, նույն ակտիվությունն այսօր ունեցել են։

Պատգամավորը նշել է, որ այնպես չէ, որ իշխանականները կարողացել են ծեծել ընդդիմադիրների օգնականին։ Դեպքը տեղի է ունեցել անվտանգության աշխատակիցների ներկայությամբ և այսօր միջամտությունը եղել է հօգուտ իշխանության ներկայացուցիչների։

«Ոնց կարող է պատգամավորն իրեն թույլ տալ, գա օգնականի հետ ֆիզիկական միջամտության մեջ մտնի։ Իմ տեղեկությունով, սկզբում իրականում ռեպլիկ է եղել պատգամավորների կողմից, որին ի պատասխան հարցադրում է հնչել պատգամավորներին և դրանից հետո հարցը սպառվել է։ Դուք նորմա՞լ եք համարում, որ կարող են ինչ-որ մեկին խաբեն, ասեն՝ արի սուրճ խմենք ու փորձեն ծեծել»։

Պատգամավորը հայտնել է, որ ԶԼՄ ներկայացուցիչները հանրայնացրել են հարցը, այն արդեն մասնավոր չէ։ Մարմնական վնասվածքներ կան, սակայն աստիճանները պատգամավորը դժվարացավ նշել։ Վարդևանյանը փաստել է՝ նախապես պայմանավորված, ծրագրավորված մի խումբ անձանց կողմից առնվազն խուլիգանության արարքի կատարում է։

Անվտանգության աշխատակիցներն այսօր, ըստ Վարդևանյանի երկու գործառույթ են իրականացնում խորհրդարանում՝ սահմանափակում լրագրողներին և միջամտում միայն այն ժամանակ, երբ իշխանական պատգամավորներն են հայտնվում ուշադրության կենտրոնում։

Աղբյուր` Փաստինֆո