Փաստ ինֆո

Բոլոր զինծառայողները, որոնք վայր են դրել իրենց զենքը և գերության հանձնվել, նրանց նկատմամբ քրեական գործ է հարուցվելու, սա օրենքի պահանջ է: Այս մասին լրագրողների հետ զրույցում ասաց ԱԺ նախագահ Ալեն Սիմոնյանն՝ անդրադառնալով իր մասնակցությամբ տեսանյութին:

Հիշեցնենք, որ տելեգրամյան ալիքներում Ալեն Սիմոնյանի մասնակցությամբ սկանդալային տեսանյութ է հրապարակվել, որտեղ նա մեղադրում է Բաքվում գտնվող հայ ռազմագերիներին՝ զենքը վայր դնելու և թշնամուն հանձնվելու մեջ. «Էդ գերիներին համարում եմ, որ արդեն իրանք չկան, իմ համար չկան»,-ձայնագրության մեջ ասում է Սիմոնյանը:

Ալեն Սիմոնյանի խոսքով՝ կան զինածառայողներ, որոնք չեն կատարել իրենց ծառայողական պարտականությունը, իրենց դիրքը չեն պահել և հանձնվել են գերության.

«Տեսնում եմ, որ Ֆեյսբուքում հաճախ հերոս բառը բավականին արժեզրկվել է՝ բոլորի նկատմամբ հավասար սանդղակ կիրառելու պատճառով: Հայոց բանակում կան բազմաթիվ հերոս տղաներ, նրանք շատ են, նրանք մեր հպարտությունն են, բայց, ցավոք, կան նաև զինվորներ և սպաներ, որոնք իրենց պարտականությունը չեն կատարել և հայտնվել են գերության մեջ»,-ասաց Սիմոնյանը:

Ալեն Սիմոնյանը պնդեց, թե տելեգրամյան ալիքներում իր մասնակցությամբ տարածված տեսանյութը մոնտաժված է.

«Նյութը մոնտաժված է, խոսքը բանակցությունների մասին է և տարբեր իրավիճակներում պետության դիրքորոշման մասին է։ Շատ ցավում եմ, մեր հայրենակիցներից մեկը ներկայացավ որպես աջակից և խնդրեց հարց տալ ինձ, ես էլ պատասխանում էի, երբ ընթացքում նկատեցի, որ մի աղջիկ կար, եթե չեմ սխալվում՝ անունը Հասմիկ, հեռախոսը պահել էր։ Ասացի՝ խնդրում եմ չնկարահանել, որովհետև զրույցի ենք բռնվել, որը չեմ ուզում հրապարակային ասել, նա էլ ասաց, թե՝ «չէ, ինչ եք ասում»։ Նման իրավիճակներն օգտագործվում են Հայաստանի շահերը հետ մղելու համար։ Այն բոլոր մարդիկ, ովքեր նման քայլ են անում, պետք է գիտակցեն, որ կա քրեական պատասխանատվություն»,-ասաց Ալեն Սիմոնյանը։

Աղբյուր` Փաստինֆո