Փաստ ինֆո

Ալեն Սիմոնյանի՝ գերիների վերաբերյալ հայտարարությունը ողջ իշխանության դիրքորոշումն է, նորմալ երկրում նա միանգամից հրաժարական կտար: «Փաստինֆո»-ի հետ զրույցում ասաց ԱԺ նախկին պատգամավոր Նաիրա Զոհրաբյանը՝ անդրադառնալով ԱԺ նախագահ Ալեն Սիմոնյանի մասնակցությամբ սկանդալային տեսանյութին:

Հիշեցնենք, որ տելեգրամյան ալիքներում Ալեն Սիմոնյանի մասնակցությամբ սկանդալային տեսանյութ է հրապարակվել, որտեղ նա մեղադրում է Բաքվում գտնվող հայ ռազմագերիներին՝ զենքը վայր դնելու և թշնամուն հանձնվելու մեջ. «Էդ գերիներին համարում եմ, որ արդեն իրենք չկան, իմ համար չկան»,-ձայնագրության մեջ ասում է Սիմոնյանը:

Մեզ հետ զրույցում Զոհրաբյանը նշեց, որ ամենևին զարմացած չէ Սիմոնյանի հայտարարություններից, քանի որ դրանք բխում են այսօրվա իշխանության քայլերի և խոսքերի տրամաբանությունից: Ավելին՝ նա պնդեց, որ հասարակության մեծ մասն ամեն կերպ փորձելու է արդարացնել Ալեն Սիմոնյանի հայտարարությունը.

«Ինձ համար այս ամենի մեջ զարմանալու ոչինչ չկա, Ալեն Սիմոնյանի հայտարարությունից ես ո՛չ ցնցված եմ, ո՛չ հուզված: Ես չեմ կարծում, որ Ալեն Սիմոնյանը այնպիսի մի արտառոց բան է ասել, որն այս իշխանության քայլերի տրամաբանությունից դուրս է: Մի կասկածեք, եթե վաղը լինի ընտրություն, այս իշխանությունը կրկին ունենալու է իր կոնստանտ անփոփոխ ձայները: Ես գիտեմ շատ մարդկանց, այդ թվում՝ ցավոք սրտի, ռազմագերիների, անհետ կորածների և զոհերի հարազատների, որոնք, անկախ ամեն ինչից, պատրաստ են նորից ձայն տալ այս իշխանությանը: Պատճառները չեմ կարող ասել, ինձ համար այդ մոտիվացիան անհասկանալի է՝ բացի տոտալ ատելության նախկինների նկատմամբ»,-ասաց Զոհրաբյանը:

Ըստ Զոհրաբյանի՝ սա միայն Ալեն Սիմոնյանի դիրքորոշումը չէ գերիների վերաբերյալ, այլ՝ ողջ իշխանության, զրուցակցի խոսքով՝«Ալեն Սիմոնյանն այս իշխանության տիպիկ ներկայացուցիչն է, այդպես մտածում են խորհրդարանում իրենցից նստած յուրաքանչյուրը».

«Իրենք բոլորն էն այդպես մտածում, երբ ինձ ասում են՝ Նիկոլը իրենց վրա կոմպրոմատներով ճնշում է գործադրում կամ Նիկոլից վախենում են, բայց իրենց մեջ ազնիվ մարդիկ կան՝ոչ, այնտեղ բոլորը անհայրենիք մանկուրդների հավաքածու է, որոնք չունեն հայրենիքի զգացողություն և արժեքային համակարգ: Ես զարմանում եմ մեր հասարակության մի հատվածի զարմանքի վրա, իսկ ի՞նչ է ասել ավելին Ալեն Սիմոնյանը, քան արել է այս իշխանությունը, երբ ասում էին՝ Շուշին մռայլ և դժգույն քաղաք է , երբ մեղադրում էին գերիներին, ասում էին՝ դեռ պետք է պարզվի՝ ինչ հանգամանքներում են գերի ընկել, հայկական բնակավայրերը կոչում էին ադրբեջանական տեղանուններով, ի՞նչ նոր բան է ասել Ալեն Սիմոնյանը, որ պատերազմից հետո չի ասվել կամ արվել, ես ավելի շատ զարմացած եմ կեղծ պաթոսի և զարմանքի վրա, որևէ բացահայտում»,-ասաց Զոհրաբյանը:

ԱԺ նախագահը նաև պնդել էր, որ «զենքը վայր դրած և գերի հանձնված զինծառայողների նկատմամբ քրեական գործ է հարուցվելու»:

Նաիրա Զոհրաբյանը հիշեցրեց, որ այս մասին ԱԺ ամբիոնից բազմիցս ասել է Նիկոլ Փաշինյանը, իսկ Ալեն Սիմոնյանը ընդամենը կրկնում է վերջինիս. «Սա իրենց համար նորմալ է, հասարակության 54%-ի համար, ովքեր իրենց քվեն տվել են այս իշխանությանը, նույնպես նորմալ է»,-ասաց Զոհրաբյանը:

Զրուցակիցը վստահեցրեց, որ Ալեն Սիմոնյանի հայտարարություններին ոչինչ էլ չի հետևելու, միևնույն ժամանակ նշեց, որ քաղաքակիրթ երկրում նման հայտարարություն արած պաշտոնյան անմիջապես հրաժարական կտար.

«Հիմա իր խոսնակը մի հայտարարությամբ կփակի թեման, այս իշխանության սատարողները այդ ամենը կկրկնեն՝ ասելով, թե կոնտեքստից կտրված է, երբ հասարակության մի զգալի հատված հետևողականորեն արդարացում է փնտրում այս իշխանության քայլերի մեջ, նրանք էլ իրավունք ունեն ասել և անել այն, ինչ ուզում են»,-ասաց Զոհրաբյանը և շեշտեց, որ նորմալ երկրում նման հայտարարություն արած պաշտոնյան հրաժարական կտար. «Ես մշտապես հավատում եմ տիեզերական արդարությանը, ես գիտեմ, որ պատասխան տալու պահը գալու է, և իրենցից որևէ մեկը, աշխարհի որ մասում էլ լինի, որ դեսպանատով էլ փախչի, չի խուսափելու այդ պատասխանատվությունից»,-եզրափակեց Զոհրաբյանը:

Աղբյուր` Փաստինֆո