Փաստ ինֆո

Ալիևի հոխորտանքը նրա հայատյաց հռետորաբանության, ինչպես նաև՝ այն իրավիճակի շարունակությունն է, որ պարտված իշխանությունները գտնվում են ճնշման տակ, պարտադրանքի ներքո։ Այս մասին լրագրողների հետ զրույցում ասաց ԱԺ «Հայաստան» խմբակցության ղեկավար Սեյրան Օհանյանը՝ անդրադառնալով Ալիևի՝ «Զանգեզուրի միջանցքի» մասին հայտարարությանը։

«Երբ ադրբեջանցիները մաքսակետ տեղադրեցին, միանգամից մեր կողմից տարան, դիմացը մաքսակետ տեղադրեցին։ Երբ անհրաժեշտ է լինում արագ զինվորական ստորաբաժանում տեղակայելու որոշում կայացնել մեր սահմանները պաշտպանելու համար, չեն անում, բայց ադրբեջանցիների մաքսակետի դիմաց միանգամից մեր մաքսակետը տեղադրում են։ Սա նշանակում է ժողովրդից թաքուն, ժողովրդի թիկունքում, նաև ընդդիմությունն այդ գործընթացներին չի մասնակցում, իրականացնել սահմանների ռեալ ճշտումներ, մանավանդ, որ ադրբեջանցիներն այդ սահմանազատումն ու սահմանագծումն իրականացնում են պարտադրանքի ձևով»,- նշեց Սեյրան Օհանյանը։

Օհանյանն արձանագրեց, որ ապաշրջափակման անվան տակ պետք է երկու հանգամանքի վրա ուշադրություն դարձնել.առաջինը՝ թուրք-ադրբեջանական կողմից Հայաստանի իշխանության խաբելն է, երկրորդը՝ այդ ապաշրջափակումը մեզ համար լինելու է խորը շրջափակում, որովհետև միջանցքի անուն տալը նշանակում է, որ ոչ թե մեկ, այլ՝ մի քանի ճանապարհ պետք է լինի այդ հատվածում։ Օհանյանի դիտարկմամբ՝ ապաշրջափակման անվան տակ մենք հայտնվելու ենք խորը շրջափակման մեջ՝ տնտեսական ճնշմամբ և Սյունիքի հատվածում մեր ժողովրդագրական դիմանկարի փոփոխությամբ։ Օհանյանի խոսքով՝ խնդիրը մեկն է և կայանում է նրանում, որ Ալիևն ինչ ուզում, այն էլ այսօր պարտադրում է։ Բացի այդ, ըստ Օհանյանի, ակնհայտ է նաև այն, որ գաղտնի բանավոր պայմանավորվածություններ կան, որոնց վրա հիմնվելով էլ Իլհամ Ալիևն այսօր նման հայտարարություններով է հանդես գալիս։

Աղբյուր` Փաստինֆո