Փաստ ինֆո

Դատաիրավական համակարգն այսօր գտնվում է շատ ավելի վատ իրավիճակում, քան 3 տարի կամ 20 տարի, կամ էլ անգամ՝ 100 տարի առաջ էր։ Այս մասին հրավիրված մամուլի ասուլիսին ասաց փաստաբան Միհրան Պողոսյանը։

Ըստ նրա՝  այսօրվա քաղաքական իշխանությունը ցանկացած հարթության մեջ գենետիկորեն անհանդուրժողականություն ունի այլ կարծիք արտահայտող ուժի հանդեպ, կլինեն՝ փաստաբաններ, քաղաքական մարմիններ, ՏԻՄ մակարդակով որոշ գործիչներ։

Փաստաբան Միհրան Պողոսյանը, որը «Սիսական» ջոկատի հրամանատար Աշոտ Մինասյանի պաշտպանն է, նշեց, որ  Աշոտ Մինասյանը կալանավորվել է 2020 թվականի նոյեմբերի 15-ին ներկայացված քննիչի պահանջի հիման վրա։

«2020 թվականի նոյեմբերի 15-ին քննիչն ասում էր, որ Աշոտ Մինասյանը, մնալով ազատության մեջ, կթաքնվի, կխոչընդոտի քննությանը ու, հնարավոր է, կատարի նոր արարք. Աշոտ Մինասյանը 2020 թվականի նոյեմբերի 15-ին չկալանավորվեց, մեկ տարի դեգերումներից հետո պարզվեց՝ քննիչը ճիշտ էր՝ Աշոտ Մինասյանը, հայտնվելով ազատության մեջ, կթաքնվի, կխոչընդոտի կամ կկատարի նոր արարք։ Այս տիպի աբսուրդ իրավաբանության իմ պրակտիկայում չեմ հանդիպել»,-ասաց Պողոսյանը՝ հավելելով, որ ժամանակն արդեն ապացուցել էր, որ Աշոտ Մինասյանը չի թաքնվել, չի խոչընդոտել, որևէ նոր արարք չի կատարել։

Պողոսյանը հիշեցրեց 2020թ նոյեմբերի 9-ին ստորագրված կապիտուլյացիոն ակտից հետո իշխանությունների վիճակը, երբ օրեր շարունասկ հնարավոր չէր գտնել Նիկոլ Փաշինյանին և պատասխանատու իշխանության ներկայացուցիչներից որևէ մեկին և այդ առումով Աշոտ Մինասյանի վերաբերյալ քրեական գործը շատ հարմար պատրվակ էր իշխանությունների համար՝ քաղաքական հարցերը լուծելու համար։ Մասնավորապես, մինչ կապիտուլյացիոն ակտի ստորագրումը ոչ ոք չէր խոսում Նիկոլ Փաշինյանի անվտանգությունից, մինչդեռ, Աշոտ Մինասյանի վերաբերյալ գործը և Արարատ Միրզոյանի ծեծի դրվագը իշխանություններն օգտագործեցին անվտանգությունն ուժեղացնելու համար։ Պողոսյանը հիշեցրեց նաև, որ Աշոտ Մինասյանին չկալանավորելուց հետո քաղաքական իշխանություններից ասում էին, որ պետք է նոր դատական իշխանություն, իբրև այդքան զենք է հայտնաբերվել, բայց դատարանները չեն կալանավորել։

«Այդ որոշումը քաղաքական իշխանությունն օգտագործեց՝ դատական իշխանության նկատմամբ այս ոտնձգությունները, հարձակումները և գրավման պրոցեսը սկսելու համար»,- նշեց Պողոսյանը։

Փաստաբանի խոսքով՝ այս իշխանությունը դատական համակարգն աղավաղելու ճանապարհով է գնում։ Ըստ փաստաբանի՝ այն դատավորները, որոնք պետք է արդարադատություն իրականացնեն, նրանց մեկուսացրել են, իսկ արդարադատություն հիմա իրականացնում են նրանք, ովքեր պատրաստ են իշխանության քիմքին հաճո արդարադատություն իրականացնել։

Պողոսյանը տեղեկացրեց, որ երկու օր առաջ է հանդիպել Աշոտ Մինասյանին. տրամադրությունը բարձր էր։

«Ինքն իր ազատությունը պատրաստ է ժամանակավորապես զիջել, բայց երբեք պատրաստ չէ զիջել հայրենիքը։ Մենք պայքարելու ենք մինչև վերջ ու ցույց ենք տալու այս քրեական գործի փուչիկ լինելը», - ասաց Միհրան Պողոսյանը։

Աղբյուր` Փաստինֆո