Փաստ ինֆո

Խնդրահարույց ենք համարում Արցախում խաղաղ բնակչի սպանությունը։ Լրագրողների հետ զրույցի ժամանակ ասաց ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանը։

«Այն բոլոր գործընթացները, որոնց ՀՀ-ն մասնակից է, առաջին հերթին միտված են, որ նմանատիպ դեպքերն օր առաջ, ժամ առաջ դադարեն, որ իրական դեէսկալացիա տեղի ունենա և որ նման դեպքերն այսուհետ բացառվեն։ Սա ՀՀ կառավարության առաջնային նպատակն է, որի համար բոլոր հնարավոր գործիքակազմներն օգտագործվում են։ Բոլոր ձևաչափերով հանդիպումների առաջնային և կարևորագույն քննարկման առարկան հանդիսանում է ՀՀ-ի թե՛ սահմանային անվտանգությունը և անխախտելիությունը, թե՛ մեր քաղաքացիների անվտանգությունը»,-ասաց պատգամավորը։

Հարցին, թե ինչու ՀՀ-ն պաշտոնապես չի ասում, որ պաշտոնյաների այցերն Արցախ լինելու են, որովհետև դա հայկական տարածք է, և Ադրբեջանը չի կարող նման պահանջ դնել, Էդուարդ Աղաջանյանը նկատեց՝ առաջին հայացքից կարող է թվալ, թե պետք է ՀՀ-ն հայտարարություններ տարածի, որոնք որոշ հանրային շրջանակների կողմից ընդունելի կամ ցանկալի ձևակերպումներ ունենան։

«Մենք պետք է գիտակցենք, որ ցանկացած հայտարարություն յուրաքանչյուր կառավարող ուժի կողմից հղի է կոնկրետ հետևանքներով, և ՀՀ յուրաքանչյուր պետական այր որևէ տառ արտասանելուց առաջ պետք է լավ գիտակցի իր խոսքի կշիռն ու հետևանքը»,-ասաց պատգամավորը։

Աղբյուր` Փաստինֆո