Փաստ ինֆո

Նիկոլ Փաշինյանի պարտությունների շղթան շարունակվում է: Նա ՏԻՄ ընտրությունների արդյունքում պարտվել է Գորիսում, Կապանում, Գյումրիում, Մեղրիում, Ախուրյանում և սա շարունակական գործընթաց է: Խորհրդարանում ասուլիսի ժամանակ հայտարարեց «Հայաստան» խմբակցության պատգամավոր Արթուր Խաչատրյանն՝ անդրադառնալով ՏԻՄ ընտրությունների արդյունքներին.

«Փաշինյանն ասում է՝ ժողովուրդը մեզ մանդատ է տվել՝ անելու այն, ինչ ուզում ենք , բայց այդ մանդատը քիչ-քիչ նվազում է, եթե այսպես շարունակվի, շուտով կտեսնենք, որ այլևս որևէ աջակցություն չունեն նրանք»,-ասաց պատգամավորը:

Արթուր Խաչատրյանի արձանագրմամբ՝ ՏԻՄ բոլոր ընտրություններն ուղեկցվել են ընտրախախտումներով:

Մասնավորապես՝ ՏԻՄ ընտրություններին ընդառաջ իշխանությունը սկսել է սոցիալական աջակցության տրամադրել մարզերին.

«Իշխանությունը փորձում էր ներկայացնել, թե դա որևէ կապ չի ունեցել ընտրությունների հետ, բայց սա զուտ համընկնում չէ»,-ասաց ընդդիմադիր պատգամավորը:

Արթուր Խաչատրյանը նաև նկատեց, որ խոշորացվոող համայնքային փնջերն այնպես են կազմվել, որ իշխանությունը կարողանա ՏԻՄ ընտրություններին հնարավորինս ավելի շատ ձայներ հավաքի.

«Համայնքների խոշորացումը ևս ուղղված է եղել ՏԻՄ ընտրություններում հաջողություն արձանագրելու համար»,-ասաց պատգամավորը և հավելեց, բացի սա՝ ընտրություններից առաջ ընդդիմադիր թեկնածուների նկատմամբ հալածանքներ են եղել, քրգործեր են հարուցվել և սպառնալիքներ են հնչեցվել նրանց հասցեին.

«Չնայած վարչական ռեսուրսի կիրառմանը՝ 36 համայնքներից ընդամենը 15-ում է ՔՊ-ն կարողացել հավաքել այնքան ձայն, որպեսզի միանձնյա տեղական իշխանություն ձևավորի, իսկ 21 համայնքում ոչ իշխանական ուժերը, 8-ում՝ միայնակ, 13-ում՝ կոալիցիայով, կարող են մեծամասնություն կազմել»,-ասաց պատգամավորը:

Ընդդիմադիր պատգամավորի խոսքով՝ իշխանությունը երեկոյան ընտրության արդյունքների ցանկ է հրապարակել, որն իրականության հետ որևէ առնչություն չունի.

«Որոշ համայնքներում, որտեղ իրենք ներկայացնում են, թե հաղթել են, իրականում հենց այդտեղ են պարտվել, քանի որ հույսը դրել են այն մարդկանց վրա, որոնք տարիներ շարունակ ընտրությունից ընտրություն սպասարկել են օրվա քաղաքական իշխանության շահերը, հիմա իրենք կարծում են, թե օգտագործել են այդ մարդկանց համայնքներում, բայց իրականում իրենք են գործիք դարձել պատեհապաշտ մարդկանց ձեռքին, որոնք սկզբունքայնություն չունեն և առաջին իսկ հնարավորության դեպքում պատրաստ են լքել խորտակվող նավը»,-ասաց Արթուր Խաչատրյանը:

Աղբյուր` Փաստինֆո