Փաստ ինֆո

Երևանի ընդհանուր իրավասության դատարանի դատավոր Մեսրոպ Մակյանը չի քննի Նիկոլ Փաշինյանի հրաժարականի պահանջով բողոքի ակցիա իրականացնելու վերաբերյալ քրեական գործը, որի շրջանակներում Արշակ Զաքարյանը, Վահագն Չախալյանը, Արագած Ախոյանը, Իսրայել Հակոբկոխյանը մեղադրվում են իշխանության յուրացման փորձ կատարելու մեջ։

Դատավոր Մեսրոպ Մակյանը սեփական նախաձեռնությամբ ինքնաբացարկ է հայտնել՝ պարզաբանելով, որ քրեական գործում որպես Արշակ Զաքարյանի պաշտպան ներգրավված փաստաբան Տիգրան Աթանեսյանն իր ընկերն է, ունեն մտերիմ հարաբերություններ։ Մասնավորապես, դատավորը նշել է, որ Տիգրան Աթանեսյանի հետ 1992-1997թթ սովորել են ԵՊՀ իրավագիտության ֆակուլտետի նույն կուրսում, ավելին՝ ինքը հանդիսանում է Աթանեսյանի կրտսեր որդու կնքահայրը։ Բացի այդ՝ Տիգրան Աթանեսյանը հանդիսանում է դատավորի եղբորորդու՝ Վահե Մակյանի հարսանիքի քավորը, ով, նույնպես հանդիսանալով փաստաբան, Տիգրան Աթանեսյանի հետ աշխատում է նույն գրասենյակում։

«Այս պարագայում, գտնում եմ, որ վերը նշված հանգամանքը լուրջ կասկածի տակ է դնում նախագահող դատավորիս անաչառությունն ու անկողմնակալությունն այս քրեական գործի քննությունն իրականացնելիս օբյեկտիվ լինելու տեսանկյունից, որն, ինչ խոսք, բխում է Տ.Աթանեսյանի հետ ունեցած մտերիմ հարաբերությունների փաստից, հատկապես այն պայմաններում, երբ գործով անցնող բոլոր մեղադրյալներին մեղսագրված են միևնույն արարքները»,- նշել է դատավորը՝ հավելելով, որ Աթանեսյանի հետ բավականին երկար ժամանակահատվածում ունեցած մտերիմ հարաբերություններն ու նրա որդու կնքահայրը լինելն իրենց բարոյական առումով չեն կարող չանդրադառնալ անձիս՝ որպես դատավորի կողմից քրեական գործի նկատմամբ ունեցած օբյեկտիվության վրա, հետևաբար, այդ պատճառով, ինչպես նաև ելնելով արդարադատության շահերից ` գտնում է, որ պետք է հայտնել ինքնաբացարկ։

Հիշեցնենք, որ հունվարի 28-ին Նիկոլ Փաշինյանի հրաժարականի պահանջով իրականացված ակցիան իրավապահները ի սկզբանե դիտարկել էին որպես կառավարության շենքը զավթելուն ուղղված գործողություններ, որի շրջանակներում 21 անձ բերման էր ենթարկվել, որոնցից հինգ հոգին՝ Արագած Ախոյանին, Արշակ Զաքարյանին, Վահագն Չախալյանին, Տիգրան Չոբանյանին և Իսրայել Հակոբկոխյանին, ձերբակալել էին, ինչը ոչ իրավաչափ էր համարվել դատարանների կողմից։

Այդուհանդերձ, նրանց մեղադրանք էր առաջադրվել ՀՀ քրեական օրենսգրքի 34-219-րդ հոդվածի 2-րդ մասի 1-ին կետի՝ մի խումբ անձանց կողմից նախնական համաձայնությամբ շենք-շինություններ զավթելու փորձի հատկանիշներով և նրանց նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որոնք նույնպես մերժվել էին՝ հիմնավոր կասկածի բացակայության հիմքով։ Շուրջ 10 ամիս քննվող քրեական գործի շրջանակներում տևական ժամանակ որևէ մեղադրյալի մասնակցությամբ որևէ քննչական գործողություն չի իրականացվել, ավելին, նախաքննության ընթացքում մեղադրյալներին բազմիցս թույլատրել են մեկնել արտերկիր և վերադառնալ, անգամ մտայնություն կար, որ նախաքննական մարմինը կկարճի գործի վարույթը, մինչդեռ նախաքննության ավարտական փուլում քննիչը որոշել է ծանրացնել մեղադրանքը. Արագած Ախոյանին, Արշակ Զաքարյանին, Վահագն Չախալյանին, Տիգրան Չոբանյանին և Իսրայել Հակոբկոխյանին մեղադրանք է առաջադրվել ՀՀ քրեական օրենսգրքի 34-300-րդ հոդվածով՝ իշխանության յուրացման փորձի հատկանիշներով, ինչի համար որպես պատիժ է նշանակվում ազատազրկումը՝ 10-15 տարի ժամկետով։

Հեղինակ՝ Իզաբել Սահակյան 

Աղբյուր` Փաստինֆո