Փաստ ինֆո

Թանկացումների մասին պաշտոնական վիճակագրությունը վստահություն չի ներշնչում։ Իրական կյանքում ավելի սրընթաց թանկացումներ ենք տեսնում։ «Փաստինֆո»-ի հետ զրույցի ժամանակ այս մասին ասաց «Հայաստանի սպառողների ասոցիացիա» ՀԿ նախագահ Արմեն Պողոսյանը։

Նրա խոսքով Հայաստանում բնակիչների եկամուտների մոտ 80 տոկոսը կազմում են սնունդը և հանրային ծառայությունները տոկոսը, որից 60 տոկոսը կազմում է սնունդը, իսկ 20 տոկոսը՝ հանրային ծառայությունները։

«Ստացվում է՝ մարդիկ անհրաժեշտ այլ բարիքներից չեն կարող օգտվել, այնինչ մարդը չի ծնվել միայն սնունդ կամ կոշիկ սպառելու համար։ Եթե սպառողական զամբյուղում կամ ընտանեկան ծախսերում տեսնում ենք, որ մշակութային կյանքի համար ծախսերը կազմում են 0 դրամ, դա չեղավ ապրել, դա եղավ սպառել կամ ուղղակի գոյություն պահպանել»,-նշեց Արմեն Պողոսյանը։

Անդրադառնալով ջրի թանկացմանը և գազի սակագնի հնարավոր բարձրացմանը՝ Արմեն Պողոսյանը նկատեց՝ Արևմուտքում, երբ հարցը գնում է հանրային ծառայությունների մասին և օրինակ անհրաժեշտ է լինում գազի սակագինը բարձրացնել, մատակարարը ներկայացնում է իր հիմնավորումները, հասարակական կազմակերպությունները ներկայացնում են իրենց հիմնավորումները, իսկ պետական հանձնաժողովը, երկու կողմերին լսելով, օպտիմալ լուծում է գտնում, մինչդեռ Հայաստանում ամեն ինչ այլ կերպ է արվում և ՀԿ-ների ձայնը հիմնականում այդքան էլ լսելի չի լինում։

«Մեզ մոտ մատակարարը ներկայացնում է իր հիմնավորումները, հանձնաժողովը՝ իր հիմնավորումները, մեր հիմնավորումներն էլ են լսում, բայց դրանք որևէ ազդեցություն չեն ունենում»,-նշեց Արմեն Պողոսյանը։

Վերջինս նշում է, որ ջրի, իսկ հետագայում նաև գազի սակագնի բարձրացումը ֆինանսական լրացուցիչ ծանրաբեռնվածության պատճառ կդառնա մարդկանց համար։

Արմեն Պողոսյանի խոսքով Հայաստանում գոյություն ունի մի խավ, որը 10-12 տոկոս է կազմում, որի համար նշանակություն չունի ինչքան կթանկանա ջուրը կամ որևէ ծառայություն, ապրանքատեսակ։

«Մյուս 88-90 տոկոսը կա՛մ մի կերպ յոլա են գնում, կա՛մ էլ սարսափելի վիճակում են և մտածում են երկիրը լքելու մասին։ Զարմանալի չէ, որ այս տարվա ընթացքում արդեն 100 հազար մարդ լքել է երկիրը։ Մենք միշտ դրական թվեր ենք լսում, հատկապես, որ սպասվում է 6 տոկոս տնտեսական աճ, ինչը հեքիաթ է։ Հետպատերազմական վիճակում տեսականորեն էլ հնարավոր չէ 6-7 տոկոսանոց աճ։ Այդ թվերով մոլորեցնում են մարդկանց»,-նշեց Արմեն Պողոսյանը։

Աղբյուր` Փաստինֆո