Փաստ ինֆո

Մինչ իշխանությունները լծված են մասնագիտական հանրության շրջանում մեծ հեղինակություն վայելող դատավորներին ճնշելու, հնարավորության դեպքում դատական համակարգից հեռացնելու գործին, փաստաբանական համայնքը պայքարում է, այսպես կոչված, «վատագույն» դատավորների դեմ, որոնք իրենց գործողություններով, ինչու ոչ՝ համակարգում իրենց գոյությամբ արատավորում և վարկաբեկում են դատական համակարգը՝ կնիքելով դատախազաքննչական մարմինների կամքը, երբեմն՝ նյութական կամ դատավարական կոպտագույն խախտումներով։ Վերջիններիս կողմից թույլ տրված առերևույթ խախտումներին պատշաճ կարգով ընթացք այդպես էլ չի տրվում. ՀՀ արդարադատության նախարարությունը կա՛մ չի նկատում, կա՛մ աչք է փակում՝ այդպիսով թե ավելի կախյալ դարձնելով դատավորների մ խմբի, թե նրանց դարձնելով «արտոնյալ» իշխանությունները կամքը դակելիս՝ օրենքն արհամարհելու համար։

Արդյունքում՝ ցածր վարկանիշ ունեցող դատավորներին վեթթինգի ենթարկելու նախաձեռնությամբ հանդես են գալիս փաստաբանական համայնքի ներկայացուցիչները։

Այսպես, փաստաբանների կողմից արդեն առնվազն երեք միջնորդություն է ներկայացվել ՀՀ արդարադատության նախարարություն՝ Վերաքննիչ քրեական դատարանի դատավոր Արմեն Դանիելյանի նկատմամբ կարգապահական վարույթ հարուցելու պահանջով՝ երեք տարբեր գործերով թույլ տրված խախտումների համար։ Միջնորդություններից մեկը ներկայացրել է ԱԺ «Պատիվ ունեմ» խմբակցության պատգամավոր Աննա Մկրտչյանի հոր՝ Արա Մկրտչյանի փաստաբան Տիգրան Ղազարյանը։ Վերջինս «Փաստինֆո»-ի հետ զրույցում տեղեկացրել է, որ դատավոր Արմեն Դանիելյանը Արա Մկրտչյանի խափանման միջոցի հարցը քննել է՝ առանց պաշտպանների մասնակցության։ Պարզվում է, Արա Մկրտչյանը կորոնավիրուսային հիվանդության վարակակիր լինելու պայմաններում իր հիվանդության մասին հայտնել է դատարանին ինչպես անձամբ, այնպես էլ փաստաբանի միջոցով՝ խնդրելով հետաձգել դատական նիստը։ Փաստաբանի խոսքով՝ Արա Մկրտչյանը հստակ արտահայտել է իր ցանկությունը և մտադրությունը՝ մասնակցել դատական եւ անձամբ պաշտպանել իր իրավունքները և օրինական շահերը, սակայն Վերաքննիչ քրեական դատարանի դատավոր Արմեն Դանիելյանը, անտեսելով դատարանին ներկայացված ապացույցները Արա Մկրտչյանի հիվանդության մասին, քննարկել է վերաքննիչ բողոքը՝ կայացնելով վերջինիս իրավունքները և ազատությունները էականորեն սահմանափակող որոշում։ Նախարարությանը ներկայացված հաղորդման շրջանակներում բացի վերոգրյալից բարձրացվել են նաև մի շարք հարցեր՝ կապված անհիմն դատական ակտ կայացնելու հետ։

Երկրորդ միջնորդությունը ներկայացրել է փաստաբան Րաֆֆի Ասլանյանը՝ Արմեն Դանիելյանի կողմից դիտավորությամբ դատավարական իրավունքի նորմերի կոպիտ խախտումներ թույլ տալու համար։ Ընդ որում՝ Ր.Ասլանյանը միջնորդությունը ներկայացրել է թե ՀՀ արդարադատության նախարարություն և ՀՀ դատավորների ընդհանուր ժողովի էթիկայի և կարգապահական հարցերի հանձնաժողով։

Մյուս միջնորդությունը ներկայացրել է Սիսիանի նախկին քաղաքապետ, ԱԺ պատգամավոր Արթուր Սարգսյանի փաստաբան Էմին Խաչատրյանը՝ հիմքում դնելով այն հանգամանքը, որ Արմեն Դանիելյանը քննել է Արթուր Սարգսյանի խափանման միջոցի հարցը՝ առանց պաշտպանական կողմին պատշաճ ծանուցելու։ Դատավորը պաշտպանական կողմից բացակայությամբ հրատապ նիստ է հրավիրել և պատգամավորին կալանավորելու որոշում կայացրել։ Փաստաբան Էմին Խաչատրյանը գտնում է, որ ՀՀ Վերաքննիչ քրեական դատարանի դատավոր Արմեն Դանիելյանի կողմից կայացված ակնհայտ անհիմն և ապօրինի որոշմամբ խաթարվել է արդարադատության բուն էությունը, խախտվել իր պաշտպանյալի մի շարք հիմնարար իրավունքներ։ Բացի այդ՝ դիտարկվող որոշմամբ թույլ են տրվել նաեւ քրեական իրավունքի և դատավարության կարևորագույն սկզբունքների խախտումներ։

«Փաստինֆո»-ի հարցին ի պատասխան ՀՀ արդարադատության նախարարությունից ձեռնպահ մնացին տեղեկություն տրամադրել դատավորի վերաբերյալ ներկայացված միջնորդությունների մասին՝ նշելով, թե՝ « դատավորի նկատմամբ կարգապահական վարույթ հարուցելու առիթների ուսումնասիրության իրավական գործընթացը հիմնված է տեղեկատվության գաղտնիության կանխավարկածի վրա, ուստի, վարույթ հարուցելու վերաբերյալ բողոքի ուսումնասիրության և հարուցված վարույթի շրջանակներում քննարկվող տեղեկությունները բացահայտման ենթակա չեն»:

Արդարադատության նախարարությանն ու նախկին օմբուդսմեն Կարեն Անդրեասյանին հետաքրքիր փորձություն է սպասվում՝ այնքան հանդուգն կգտնվեն, որ բացահայտ ի ցույց կդնեն իշխանական վեթթինգի բուն նպատակը, այն է՝ դատական համակարգը ձեւել արմենդանիելյանների հագով, թե գոնե կունենան այնքան ողջախոհություն, որ ցուցադրաբար մեկին կպատժեն՝ իրենց իսկ քաղաքական շահերից ելնելով։

Հեղինակ՝ Իզաբել Սահակյան

Աղբյուր` Փաստինֆո