Փաստ ինֆո

ՏԿԵ փոխնախարար Արմեն Սիմոնյանը տեղեկություն չունի, թե ադրբեջանցիները երկաթգիծ են կառուցում դեպի Նախիջևան և արդեն գնացքով շարժվում են։ Այս մասին լրագրողների հետ զրույցում ասաց ՏԿԵ փոխնախարար Արմեն Սիմոնյանը։ 

Նրա խոսքով՝ նոյեմբերի 9-ի հայտարարության 9-րդ կետով ենթադրվում է, որ պետք է տեղի ունենա տրանսպորտների և տնտեսական կապերի ապաշրջափակում։

«Հունվարի 11-ի հայտարարության համաձայն նախանշվել են 4 կետով այն մեխանիզմները, որոնց հիման վրա այդ ամենը պետք է արվի:

Այսինքն ստեղծվում է եռակողմ աշխատանքային խումբ՝ փոխվարչապետների մասնակցությամբ եւ ուսումնասիրվում են տարբեր երթուղիներ»,- նշեց Սիմոնյանը՝ հավելելով, որ նույն հայտարարության մեջ նշված է, որ որպես առաջնահերթություն դիտարկվում են երկաթուղային և ավտոմոբիլային ճանապարհները։ Սիմոնյանը հայտնեց, որ երկաթուղու մասով ամեն ինչ պարզ է, թե ինչ ուղղություններ ունենք. Մեկը՝ Երասխից դեպի Նախիջևան անցնող ուղղությունն է, մեկը՝ հարավով՝ Մեղրիով անցնող ուղղությունն է։

«Մեկ ուղղություն ունենք, որը գնում է Հրազդանից Իջեւանով դեպի Ադրբեջան, ունենք ուղղություն, որն այսօր գործում է, դա Վրաստանի տարածքով է, եւ եւս մեկ երկաթուղային ուղղություն ունենք, որը դեպի Թուրքիա է գնում: Այս փուլում դեռ քննարկվում են երթուղիները, սահմանով անցնելու պրոցեդուրաները։ Ես որևէ կոնկրետ բան ասել չեմ կարող, որովհետև որևէ հստակություն չկա։ Պետք է լինի ապաշրջափակում, որևէ այլ բան չի քննարկվում և չի քննարկվելու մեր կողմից»,-հայտարարեց փոխնախարարը՝ հավելելով, որ խոսքը տարանցիկ փոխադրումների մաիսն է։

Նրա խոսքով՝ մենք Ադրբեջանի տարածքով երկաթուղային և ավտոմոբիլային կապ ենք ստանում ՌԴ հետ, Նախիջևանի տարածքով՝ Իրանի հետ, սրանք են հիմանական ուղղությունները, որոնք հնարավոր է, որ այս պարագայում ապաշրջափակվեն։

Աղբյուր` Փաստինֆո