Փաստ ինֆո

Ապաշրջափակման եռակողմ հանձնաժողովին դեռ չի հաջողվում համաձայնության գալ։ «Ազատություն» ռադիոկայանի եթերում այս մասին ասել է Անվտանգային խորհրդի քարտուղար Արմեն Գրիգորյանն՝ անդրադառնալով երեկ Մոսկվայում կայացած փոխվարչապետերի մակարդակով եռակողմ հանդիպմանը։

Արմեն Գրիգորյանը նշեց, որ Սոչիում կար պայմանավորվածություն, բայց եռակողմ հանձնաժողովին դեռևս չի հաջողվել համընդհանուր համաձայնություն ձևակերպել։

«Եռակողմ հանձնաժողովն աշխատանքները շարունակելու է, բայց մեր օրակարգը շարունակում է մնալ այն, որ միջազգային տրամաբանությամբ որևէ քննարկում չի կարող լինել։ Մենք պատրաստ ենք ապաշրջափակմանը, պատրաստ ենք քննարկել՝ վերականգնելու այն ենթակառուցվածքները, որոնք Խորհրդային միության շրջանում գոյություն են ունեցել։ Պատրաստ ենք նաև քննարկել ճանապարհային այն ուղիները, որոնք Ադրբեջանը մեզ է տրամադրելու, որ Ադրբեջանի տարածքն օգտագործենք այլ երկրների հետ կապվելու համար, և այն ճանապարհները, որով Ադրբեջանը հնարավորություն է ստանալու Նախիջևանի հետ կապ հաստատել»,-նշեց ԱԽ քարտուղարը։

Վերջինս հավելեց՝ նախատեսվում է մոտ ժամանակում ևս հանդիպում կազմակերպել։ Եթե հանձնաժողովի աշխատանքներում որևէ առաջընթաց լինի, Արմեն Գրիգորյանը վստահեցրեց, որ հանրությունը կտեղեկացվի այս մասին։

Դիտարկմանը՝ հանձնաժողովին չի հաջողվել համաձայնության գալ, որովհետև Բաքուն պնդում է, որ միջա՞նցք է ուզում, Արմեն Գրիգորյանն ասաց, որ Հայաստանը որևէ միջանցքային տրամաբանությամբ հարց չի քննարկել ու չի էլ քննարկելու։

«Այս առումով շարունակում ենք պնդել, որ պետք է ամբողջովին մեր քննարկումները մնան նոյեմբերի 9-ի, հունվարի 11-ի և նոյեմբերի 26-ի հայտարարությունների շրջանակում, որտեղ միջանցքի մասին խոսք չկա և չի էլ կարող լինել»,-նշեց ԱԽ քարտուղարը։

Արմեն Գրիգորյանն ասաց, որ Հայաստանը կառուցողական է և պատրաստ է քննարկումներն առաջ տանել։ ԱԽ քարտուղարը կարծում է, որ Ադրբեջանը չի կարողանում քաղաքական այնպիսի կամք դրսևորել, որը հնարավորություն կտա Սոչիում ձեռք բերված պայմանավորվածություններն առաջ տանել։

Աղբյուր` Փաստինֆո