Փաստ ինֆո

Կարմիր շուկայում այսօր տևական ժամանակ կրակոցներ են լսվել, ադրբեջանցիները գնդացրից և ավտոմատներից անկանոն կրակոցներ են արձակել, սակայն այդ կրակոցները չեն եղել անմիջապես Կարմիր շուկայի ուղղությամբ, այլ մի քանի կմ հեռավորության վրա:

«Փաստինֆո»-ի հետ զրույցում հայտնեց Արցախի ԱԺ պատգամավոր Մետաքսե Հակոբյանը՝ մանրամասներ ներկայացնելով Արցախում ադրբեջանցիների հերթական սադրանքից:

Պատգամավորի հաղորդմամբ՝ չնայած այս միջադեպին, ընդհանուր առմամբ վերջին շրջանում Արցախում սահմանային իրավիճակը հանգիստ է, լուրջ միջադեպեր չեն արձանագրվել:

Մեզ հետ զրույցում պատգամավորը մտահոգություն հայտնեց, որ Արցախում բնակչությունը ծայրահեղ ծանր վիճակում է, անվտանգային լուրջ խնդիրներին ավելացել են նաև սոցիալական անտանելի անարդարությունները.

«Ծանր է բեռը, սոցիալական շատ խնդիրներ կան, բացի դա՝ Արցախի իշխանությունները որևէ կերպ զբաղված չեն Արցախի անվտանգությամբ, քաշվել են մի կողմ, ինչ լինի, ըստ իրենց, ռուս խաղաղապահներն են պատասխանատու կամ մեղավոր»,-ասաց նա և հավելեց. «անորոշ վիճակից, Հայաստանի և Արցախի իշխանությունների համառ լռության պատճառով՝ բնակիչները, իրենց ենթադրությունների հիման վրա, գտնում են, որ այսօր Արցախում ապրելն անվտանգ չէ, բոլորը անհանգստացած են՝ ի՞նչ կլինի 2025թ-ից հետո, երբ ռուս խաղաղապահները դուրս գան Արցախից: Ես հարց եմ ուղղել Արայիկ Հարությունյանին՝ի՞նչ է լինելու Արցախի հետ 5 տարի անց, սակայն մինչ օրս պատասխան չեմ ստացել: Այստեղ գուշակություններ են անում, որ ռուսը չի գնալու, ռուսը մնալու է, բայց դա երկրի նախագահի և երկրի անվտանգության երաշխավորի պատասխան չէ: Բոլորս սպասում են Արցախի նախագահի պատասխանին, սակայն նա լռում է»:

Սոչիում Հայաստանի, Ռուսաստանի և Ադրբեջանի ղեկավարների հանդիպումից հետո որոշում է կայացվել սահմանագծման և սահմանազատման աշխատանքներով զբաղվող աշխատանքային խումբ ստեղծելու վերաբերյալ:

Թե ի՞նչ հետևանքներ կարող է ունենալ առանց Արցախի կարգավիճակի հստակեցման սահմանազատում և սահմանագծում իրականացնելը, ի՞նչ անհանգստություններ կան այս առնչությամբ Արցախում՝ Մետաքսե Հակոբյանը նշեց, որ Արցախը, կարծես թե, բոլոր առումներով մոռացվել է:

Նրա խոսքով՝ Հայաստանի իշխանությունները դեռևս նոյեմբերի 9-ին հրաժարվել են Արցախից, Արցախի հարցն ընդհանրապես չի էլ շոշափվում.

«Նվնվոցի նմանվող հայտարարություններ կարող են լինել Հայաստանի իշխանությունների կողմից, իսկ, ընդհանուր առմամբ, իրենք որևէ բան չեն պատրաստվում անել Արցախի կարգավիճակի հետ կապված: Սահմանազատման և սահմանագծման աշխատանքներից հետո Հայաստանն այլևս որևէ իրավական հիմք չի ունենա Արցախի նկատմամբ,անգամ՝ ֆինանսական աջակցություն տրամադրելու առումով: Սրան զուգահեռ Արցախի նախագահը կարողանում է ժողովրդին խաբել, թե ինքն ստիպված է Նիկոլ Փաշինյանի խոսքը ընդունում, քանի որ Նիկոլ Փաշինյանը գումար է տալիս Արցախին։ Սա, իհարկե, հերթական մանիպուլյացիան է ժողովրդի նկատմամբ: Այն սոցիալական միջոցները, որոնք մտնում են Արցախ, դրա շատ չնչին մասն է ժողովրդին հասնում, թե ո՞ւր է գնում և ի՞նչ խողովակներով՝Աստված գիտի »,-ասաց պատգամավորը:

Ըստ նրա՝ եթե Հայաստանի իշխանությունները ճանաչեն Ադրբեջանի տարածքային ամբողջականությունը, դա դեռ չի նշանակի, որ Արցախն Ադրբեջանին է պատկանում:

Պատգամավորի խոսքով՝ դա ուղղակի կլինի Հայաստանի իշխանությունների դիրքորոշումը, իսկ Արցախի ժողովուրդը վաղուց ինքնորոշվել է և հռչակել է իր անկախ լինելը՝ դրանով իսկ հաստատելով Արցախում ապրելու իր իրավունքը.

«Միջազգային հանրությունը չի ճանաչել Արցախի անկախությունը, մի մասը համարում է այն վիճարկելի տարածք, մի մասն էլ դիտարկում է Ադրբեջանի մաս ,նույնիսկ մեր բարեկամ պետությունները, որոնք Արցախը դիտարկում են որպես Հայաստանի մաս կամ անկախ պետություն, դրա տակ որևէ հիմք չեն դնում:

Ամեն դեպքում Արցախի հարցը կոնֆլիկտ է, որը լուծված չէ, անկախ նրանից, թե ինչ կլինի երբ ՀՀ-ն ճանաչի Ադրբեջանի տարածքային ամբողջականությունը ՝ Արցախի բնակչության մի ստվար հատված երբեք չի լքի Արցախը: Մենք չենք լքի, քանի որ սա մեր հայրենիքն է, եթե մենք ինքնորոշվել ենք, որ սա մեր հայրենիքն է և ապրելու իրավունք ունենք այստեղ, ապա որևէ մեկը միջազգային օրենքներով իրավունք չունի գալ և այստեղից հանել բնակչությանը »,-ասաց Արցախի պատգամավորը և շեշտեց ՝ որոշումը մեկն է ՝արցախցին երբեք չի ապրելու ադրբեջանցիների հետ և չի լքելու իր հայրենիքը։

«Իսկ թե ինչպե՞ս կզարգանան քաղաքական իրավիճակները, դա հետագայում կտեսնենք, որովհետև այլ իշխանությունների գոյության դեպքում, հնարավոր չէ շատ բաներ կանխատեսել, չգիտենք՝ վաղն ի՞նչ կարող են անել »,-ասաց Մետաքսե Հակոբյանը:

Աղբյուր` Փաստինֆո