Փաստ ինֆո

Երևանի Սուրբ Գրիգոր Լուսավորիչ մայր եկեղեցում տեղի ունեցավ Ցորի զորամասի Դ-20 հրետանային դիվիզոնի տղաների` Ազատյան Դավիթ Լևոնի, Անտոնյան Հայկ Հովհաննեսի, Դանիելյան Կարեն Բորիկի, Միքայելյան Արտակ Ջիվանի, Օհանյան Նարեկ Արմենի, Պապյան Վահե Արթուրի, Պապիկյան Հայկ Մհերի, Պողոսյան Ռուբեն Արսենի, Պողոսյան Սամվել Ստեփանի հոգեհանգստի արարողությունը։

Եկեղեցու բակում տեղի ունեցավ զինվորական արարողակարգ։ ԱՀ նախագահի հրամանագրով՝ կատարած սխրանքների և արիության համար հերոսները հետմահու պարգևատրվել են «Մարտական խաչ» երկրորդ աստիճանի շքանշանով։

Ավելի վաղ հայտնել էինք, որ շուրջ մեկ տարի և երկու ամիս անհետ կորած համարվող Ցորի Դ-20 դիվիզոնի տղաների աճյունները գտնվել են։

Նոյեմբերի երկուսին Արցախի հանրապետության Մարտունու շրջանի Կարմիր շուկա համայնքի խաչմերուկում ռուսական խաղաղապահ զորակազմի ուղեկցությամբ, երկար բանակցություններից հետո ադրբեջանական կողմը հայկական կողմին է փոխանցել արցախյան 3-րդ պատերազմի ընթացքում զոհված և անհետ կորած համարվող 11 հոգու աճյուն:

Ավելի վաղ, «Փաստինֆո»-ն անդրադարձել էր հրետանային դիվիզիոնի զինծառայողների անհետ կորելու փաստին։

Պատերազմը սկսվելուց հետո միտումնավոր, թե անգիտակցաբար, հրետանավորներին հրաման էր տրված տեղակայվել սահմանագիծ չունեցող տարածքում։ Հերոսները դիվերոսիոն խմբի հարձակմանն են ենթարկվել 2020-ի հոկտեմբերի 12-ին ու միայնակ մնացել հարյուրավոր ադրբեջանցիների հետ, երբ սպաներն ու մի քանի զինծառայողներ լքել են կռվի թեժ կետը։ Որոնողական աշխատանքների արդյունքում 21 անհետ կորած զինվորներից 9-ի մարմիններն են գտնվել, իսկ 12-ը համարվում էին անհետ կորած։ Զինծառայողների հարազատներն առաջին իսկ օրվանից փորձում էին բացահայտել մութ պատմությունները։

Աղբյուր` Փաստինֆո