Փաստ ինֆո

Ստամբուլում և Թուրքիայի հյուսիս-արևմտյան նահանգներում մոլեգնած փոթորկի հետևանքով զոհերի թիվն ավելանում է։ Այժմ հայտնի է վեց զոհի մասին, 46-ը՝ վիրավորվել է, որոնց շրջանում կան նաև ծանր վիրավորներ։

Թուրքիայի առողջապահության նախարար Ֆահրեթթին Քոջան հայտարարել է, որ միայն Ստամբուլում ավերված տանիքների փլատակների տակ մահացել է 4 մարդ։

«Տարերային աղետի հետևանքով վիրավորվել է 46 մարդ, ևս 4 -ը զոհվել են», - ասված է Առողջապահության նախարարի հայտարարության մեջ: Եվս մեկ մարդ զոհվել է Կոջաելի նահանգում, 8-ը ՝ վիրավորվել փոթորկի հետևանքով ընկած տանիքների բեկորներից, կան զոհեր նաև Զոնգուլդակ նահանգում։

Հարավ-արևմտյան ուժեղ քամին, որը տեղի բնակիչները անվանում են «լոդոս», այս օրերին երկրում կյանքեր է խլում ու զգալի նյութական վնասներ հասցնում երկրին։

Ստամբուլի նահանգապետը հայտարարել է դպրոցներում պարապմունքների չեղարկման մասին ՝ կապված քաղաքում մոլեգնող փոթորկի հետ։ Պետական հաստատություններում աշխատանքից կազատվեն նաև հղի կանայք և հաշմանդամները։

Ստամբուլի օդանավակայանները ևս փոթորկի պատճառով դադարեցրել են չվերթները՝ հաղորդում է Turkish Airlines-ը։

«Ներկայումս ուժեղ քամու պատճառով դադարեցվել է Ստամբուլից մեկնող չվերթներում ուղևորների գրանցումը։ Օդում գտնվող ինքնաթիռների վերաբերյալ քննարկվում է այլ օդանավակայաններ տեղափոխելու հնարավորությունը», - հայտնել է ավիաընկերության ներկայացուցիչը։

Նախօրեին առավոտյան ժամերին սաստկացած քամուց բազմաթիվ շրջաններում ծառեր և էլեկտրասյուներ են տապալվել, վնասվել և պոկվել են տների տանիքներ, կողաշրջվել են բեռնատարներ։ Փոթորիկը խորտակել է նաև ձկնորսական նավակներ։

Ուժեղ քամին դեռևս շարունակում է պահպանել իր ազդեցությունը։

Աղբյուր` Փաստինֆո