Փաստ ինֆո

Հայաստանը շատ վտանգավոր խաղ է խաղում Ռուսաստանի և Արևմուտքի հետ: Մինչև պատերազմն էլ Հայաստանի համար մանևրելու հնարավորությունները շատ չէին, հիմա ավելի են փոքրացել,քանի որ այժմ թե՛ անվտանգային, թե՛ տնտեսական առումով Հայաստանը շատ է կախված Ռուսաստանից, դրա համար էլ այսպիսի խաղերը Արևմուտքի և Ռուսաստանի հետ շատ վտանգավոր են: «Փաստինֆո»-ի հետ զրույցում ասաց քաղաքագետ Հայկ Խալաթյանը:

Ըստ փորձագետի՝ Ռուսաստանը շատ լավ հասկանում է, որ այս պահին Հայաստանը մանևրելու հնարավորություն չունի, իսկ բոլոր նման քայլերը վնաս են բերելու առաջին հերթին ոչ թե Ռուսաստանին, այլ՝ հենց Հայաստանին։

«Ռուսաստանը հստակ ասում է՝ մենք չենք կարող ավելի շատ մտածել Հայաստանի և հայ ժողովրդի մասին, քան՝ Հայաստանի իշխանությունները, եթե Հայաստանի իշխանությունները գտնում են, որ Հայաստանի համար լավ է վնասներ կրել, վտանգի ենթարկել իր սահմանները և Արցախը, ապա Ռուսաստանը հանգիստ է սրան վերաբերվում: Նույնիսկ Հայաստանի կորուստը նրանց համար կլինի ցավալի, բայց ոչ «մահացու», իսկ Հայաստանի համար Ռուսաստանի հետ խնդիրները կարող են «մահացու լինել»,-ասաց Հայկ Խալաթյանը:

Քաղաքագետի նշեց, որ եթե շատ հմուտ քաղաքական գործիչներ, դիվանագետներ լինեին իշխանական թիմում, ապա մանևրելու այս փորձերն իր համար հասկանալի կլինեին.

«Բայց մենք բոլորս տեսել ենք, որ այս իշխանությունը ընդունակ չէ ոչ թե խելացի, այլ գոնե նորմալ դիվանագիտական աշխատանք տանել իր դաշնակիցների հետ: Եթե նրանց թվում է, թե այս հարցում հաջողության կարող են հասնել, ապա սխալվում են, սա շատ վատ հետևանքներ կարող է ունենալ Հայաստանի համար»,-վստահեցրեց փորձագետը:

Երևանը հաստատել է, որ Նիկոլ Փաշինյանը կմասնակցի ԱՄՆ-ի նախաձեռնությամբ դեկտեմբերի 9-10-ը կազմակերպվելիք «Հանուն ժողովրդավարության» հեռավար գագաթնաժողովին: Հատկանշական է, որ կազմակերպված համաժողովին տարածաշրջանից միայն Հայաստանն ու Վրաստանն են մասնակցելու հրավեր ստացել:

Ռուսաստանն ակնհայտ ցույց է տվել իր բացասական վերաբերմունքը այս նախաձեռնությանը, ռուսական կողմից հնչած հայտարարությունների մեջ թեև կոնկրետ Հայաստանի մասին խոսք չկար, բայց, թե՛ Ռուսաստանի նախագահի խոսնակ Դմիտրի Պեսկովը, թե՛ ՌԴ ԱԳՆ ներկայացուցիչ Մարիա Զախարովան չեն թաքցրել՝ Մոսկվայի բացասական վերաբերմունքը։

Ըստ Հայկ Խալաթյանի՝ այս գագաթնաժողովը դիտարկվում է հակառուսական և հակաչինական նախաձեռնություն, ուստի Ռուսաստանը և Չինաստանը շատ բացասական են վերաբերվում թե՛ նախաձեռնությանը, թե՛ այն երկրներին, որոնք մասնակցում են դրան.

«Նայեք՝ ինչպե՞ս են Ռուսաստանի բարձրաստիճան պաշտոնյաները բնութագրում այդ գագաթնաժողովի մասնակցող երկրներին: Սա շատ բացասաբար է ընդունվելու Ռուսաստանի կողմից: Ոչ միայն Ռուսաստանն է շատ բացասական վերաբերվում այս նախաձեռնության, այլ նաև Չինաստանը, նայեք՝ ինչ կոշտ հայտարարություններ են անում Չինաստանի ԱԳՆ-ն և չինացի բարձրաստիճան պաշտոնյաները: Ոչ մեկը չի թաքցնում, որ այդ նախաձեռնությունը դիտարկվում է հակառուսական և հակաչինական նախաձեռնություն, իրենց համար էլ է հարցական՝ իսկ ի՞նչ գործ ունի Հայաստանը այստեղ:

Չինաստանի համար այդքան էլ կարևոր չէ Հայաստանի մասնակցությունը, դա ավելի շատ Ռուսաստանին կարող է մտահոգել: Հայաստանը բարդ իրավիճակում է՝ մի կողմից ԱՄՆ-ի հետ պետք չէ կոնֆլիկտների մեջ մտնել, բայց հաշվի առնելով՝ ի՞նչ վերաբերմունք ունեն Ռուսաստանը և Չինաստանը այս նախագծի նկատմամբ, Նիկոլ Փաշինյանը պետք է օգտագործեր Սոչիի հանդիպումը և փորձեր հասկացնել ռուսական կողմին, որոնց Հայաստանի մասնակցությունն ուղղված չէ հակառուսական որևէ ծրագրին »,-ասաց Խալաթյանը՝ միևնույն ժամանակ նկատելով ՝ Հայաստանի մասնակցության մեջ Ռուսական կողմի համար անսպասելի բան չկար, քանի որ Ռուսաստանի երբեք էլ դրական վերաբերմունք չի ունեցել Փաշինյանի և իր թիմի նկատմամբ:

Քաղաքագետի դիտարկմամբ՝ եթե Հայաստանին են հրավիրել նման գագաթնաժողովի՝ նշանակում է , որ կան արևմտյան որոշ ծրագրեր, որոնցում, ըստ նրանց, Հայաստանը հնարավոր է մասնակցի՝ ի տարբերություն մյուս ԵԱՏՄ անդամ երկրների:

«Հակառուսական և հակաչինական ծրագրերի մասին է խոսքը »,-պարզաբանեց Հայկ Խալաթյանը:

Զրուցակիցը չբացառեց, որ պրոպագանդիստական ճակատում Ադրբեջանը փորձի օգտագործել Հայաստանի մասնակցությունը այս գագաթնաժողովին՝ հայ-ռուսական հարաբերությունների վրա ազդելու նպատակով.

«Ադրբեջանը շատ ակտիվ լոբբիստական աշխատանք է տանում Ռուսաստանում և ռուսական մամուլում, Ադրբեջանը լավ է հասկանում նաև «ցավոտ կողմերը» ռուսական քաղաքական էլիտայի, բայց ես չեմ կարծում՝ եթե բացասական վերաբերմունք լինի, դա լինի Ադրբեջանի գործողությունների հաշվին, Ռուսաստանն այնքան բացասաբար է վերաբերվում այս նախաձեռնությանը, որ դժվար ադրբեջանցիներն ավելի ուժեղացնեն այդ վերաբերմունքը»,-ասաց Հայկ Խալաթյանը:

Աղբյուր` Փաստինֆո