Փաստ ինֆո

Երևանի ընդհանուր իրավասության դատարանը՝ դատավոր Դավիթ Արղամանյանի նախագահությամբ, բավարարել է ՀՀ պաշտպանության նախկին նախարար Դավիթ Տոնոյանի կալանավորումը ևս երկու ամսով երկարացնելու մասին քննիչի միջնորդությունը։ Այս մասին «Փաստինֆո»-ին հայտնեց փաստաբան Սերգեյ Հովհաննիսյանը։ 

Նրա փոխանցմամբ՝ դատական նիստը տևել է շուրջ երեք օր, որոշումը հրապարակվել է նոյեմբերի 27-ի երեկոյան։ Պաշտպանության կողմը դեռևս չի ստացել դատարանի որոշումը, ուստի պաշտպանը դեռևս զերծ մնաց որոշման վերաբերյալ մեկնաբանություն կատարելուց, միայն վստահեցրեց՝ ոչ կալանավորման հիմքերի, ոչ պայմանների մասով որևէ նոր բան չի ներկայացվել, իսկ եղածն էլ բավարար չէր՝ առհասարակ կալանավորումը որպես խափանման միջոց ընտրելու համար։ Դատարանի որոշումը ստանալուց հետո պաշտպանության կողմը վերաքննիչ բողոք կներկայացնի։

Ինչ վերաբերում է Դավիթ Տոնոյանի մասնակցությամբ քննչական գործողություններին, ապա, նրա տեղեկացմամբ, որևէ գործողություն այս ընթացքում չի եղել, Տոնոյանը դեռևս ցուցմունք չի տվել։ Իսկ թե արդյո՞ք Տոնոյանի դեմ ցուցմունքներ կան, թե ոչ՝ նկատի ունենալով այն հանգամանքը, որ գործով նոր անձինք են ներգրավվել՝ Տոնոյանի փաստաբանը նշեց, որ վարույթն իրականացնող մարմինը պարզապես չունի հնարավորություն՝ Տոնոյանի վերաբերյալ ապացույց ձեռք բերելու, այդ թվում՝ ցուցմունք։

«Այս մարդու առնչությունն ընդհանրապես չկա։ Հավատացեք, եթե հնարավորություն ունենային ձեռք բերելու, վաղուց ձեռք բերած կլինեին»,- նշեց փաստաբանը։

Նա նաև տեղեկացրեց, որ քրեական գործով նշանակված դատատեխնիկական փորձաքննության եզրակացությունը, որին պաշտպանը դեռևս ամբողջությամբ չի ծանոթացել, սակայն գտնում է, որ նշված փորձաքննությամբ շատ բան չի պարզվի, քանի որ այն փորձաքննությունները, որոնցով կարող էր ինչ-որ բան պարզվել, թողնվել է անկատար։

«Նշված փորձաքննության ամբողջ էությունը կայանում էր նրանում, որ, ի վերջո, օրինակ այդ սպառազինության վրա գրվածը ճիշտ է, թե ոչ։

Այնպիսի հարցեր էին, որ կարող էին նույնիսկ փորձագետին էլ չտալ, քննիչն էլ կարող էր պատասխանել այդ հարցերին»,- նշեց Հովհաննիսյանը՝ հավելելով, որ միջնորդություններ էին ներկայացրել՝ փորձագետին բացարկ հայտնելու, փորձաքննությանը՝ պաշտպանության կողմի ներգրավվման, փորձագետին նոր հարցեր առաջադրելու մասին, ինչպես նաև՝ բողոքարկել էին քննիչի անգործությունը՝ փորձաքննություններն անկատար թողնելու մասին որոշումը, սակայն բոլոր միջնորդությունները շատ արագ մերժվել են, ըստ պաշտպանի՝ առանց որևէ օբյեկտիվ հիմնավորման։

Հիշեցնենք, որ ՀՀ ՊՆ նախկին նախարար Դավիթ Տոնոյանը և զենքի մատակարարմամբ զբաղվող գործարար Դավիթ Գալստյանը՝ Պատրոն Դավոն ձերբակալվել են ԱԱԾ-ում քննվող քրեական գործի շրջանակներում և կալանավորման միջնորդություն ներկայացրել դատարան, որոնք բավարարվել են։ Ըստ ԱԱԾ տարածած հաղորդագրության՝ Դավիթ Տոնոյանը և Դավիթ Գալստյանը որպես մեղադրյալ են ներգրավվել 2,277,323,840 ՀՀ դրամ գումար հափշտակելու և կեղծիքներ, հանրորեն վտանգավոր արարքներ կատարելու համար։ Քրեական գործի շրջանակներում ձերբակալվել, ապա կալանավորվել է նաև ՀՀ ԶՈՒ ԳՇ պետ Ստեփան Գալստյանը: Նա մեղադրվում է նյութական ծանր հետևանքներ առաջացնող պաշտոնեական դիրքի չարաշահման և պաշտոնեական կեղծիք կատարելու մեջ:

Հեղինակ՝ Իզաբել Սահակյան

Աղբյուր` Փաստինֆո