Փաստ ինֆո

Նիկոլ Փաշինյանը կուլիսային խոստում է տվել Զանգեզուրի միջանցքի վերաբերյալ: «Փաստինֆո»-ի հետ զրույցում արձանագրեց ադրբեջանագետ Գառնիկ Դավթյանը:

Թուրքիայի և Ադրբեջանի ղեկավարները հերթական անգամ միջազգային հարթակում խոսել են այսպես կոչված «Զանգեզուրի միջանցքի» մասին: Ադրբեջանի նախագահն, օրինակ, Սոչիում կայացած եռակողմ հանդիպումից հետո վ հայտարարել է, թե Զանգեզուրի միջանցքն արդեն իրականություն է դառնում, նման պնդում է արել նաև Թուրքիայի նախագահը:

Սոչիում ընդունված նոր եռակողմ հայտարարության մեջ թեև խոսվում է ճանապարհների մասին, սակայն ՌԴ նախագահն իր ելույթում ևս օգտագործել է միջանցք բառը:

Ըստ զրուցակցի՝ կա կասկած, որ Նիկոլ Փաշինյանն առանձին զրույցների ժամանակ միջանցքի մասին խոստումներ է տվել.

«Ավելի կոնկրետ, պատերազմից հետո՝ հունվարի 11-ի հանդիպման ժամանակ: Ընդհանուր կարծիքները տարբեր են միջանցքի և ճանապարհի մասով, դժվար է կոնկրետ ինչ որ բան ասել կամ պնդել »,-մանրամասնեց Գառնիկ Դավթյանը:

Զրուցակիցը միևնույն ժամանակ նկատեց, Ադրբեջանի և Թուրքիայի համար հիմա լիարժեք պայմաններ են ստեղծվել այդ միջանցքը ստանալու համար.

«Դարեր շարունակ Թուրքիան երազել է թուրքական աշխարհի հետ կապի մասին, պետք է հասկանանք, որ այսօր Ադրբեջանի և Թուրքիայի համար լիարժեք պայմաններ են ստեղծվել այդ միջանցքը ստանալու համար, առաջին պայմանը՝ պարտված Հայաստանն է, պարտված ղեկավարը և երկրորդ՝ ընդհանրապես արտաքին քաղաքականությունից բոբիկ և ապաշնորհ կառավարությունը: Իրենք այս երեք ուղղությամբ էլ օգտվում են առիթից և շանտաժի, ուժի կիրառման, սահմանային լարումների և բանավոր հայտարարությունների միջոցով փորձում են մեծացնել ճնշումը, այնքան ժամանակ այսպես կշարունակեն մինչև ստանան իրենց համար ցանկալի միջանցքը: Ամբողջը կախված է մեր ղեկավարությունից՝ ինչքա՞ն կդիմանա այդ ճնշմանը և արտաքին ի՞նչ քաղաքականություն կվարի»,-ասաց Գառնիկ Դավթյանը՝ չբացառելով, որ Թուրքիան և Ադրբեջանը Նիկոլ Փաշինյանի վրա անմիջական ճնշման արդյունքում հասնեն հաջողության միջանցքի հարցում՝ հաշվի առնելով, որ նա պարտված ղեկավար է.

«Բոլոր հատարարություններից բխում է, որ միջանցքը քիչ հավական է, չնայած ադրբեջանական և թուրքական պնդումներին, մյուս կողմից էլ ակնհայտ է, որ կան կուլիսային պայմանավորվածություններ: Առաջին անգամը չէ, որ մենք փաստի առաջ ենք կանգնում՝ ինչպես օրինակ Գորիս-Կապան ավտոճանապարհի դեպքում, նոյեմբերի 9-ի փաստաթղթի դեպքում, սա կլինի երրորդ նման փաստաթուղթը, Նիկոլ Փաշինյանը կասի՝ որպեսզի պատերազմը չլիներ, զոհեր չտայինք, դրա համար թուղթը ստորագրել եմ, մոտավոր այս տրամաբանության մեջ կլինի:Բայց պետք է հաշվի առնենք, որ այդ միջանցքը բավականին մեծ սկանդալի առիթ դարձավ Իրանի և Ադրբեջանի միջև, չնայած՝ հիմա այդ սկանդալը հարթվել է, բայց այս համատեքստում տարընթերցումներ կլինեն այնքան ժամանակ, մինչև որևէ կողմը չհասնի վերջնական հաջողության»,-ասաց Գառնիկ Դավթյանը:

Զրուցակցի խոսքով՝ Թուրքիայի և Ադրբեջանի նախագահների հայտարարությունները Զանգեզուրի միջանցքի վերաբերյալ հայ հասարակության շրջանում անհանգստություն և ըմբոստություն առաջացնելու համար են, քանի որ նրանք շատ լավ գիտեն, որ հասարակությունը չի վստահում իշխանությանը:

Փորձագետը միևնույն ժամանակ նշեց, որ ամեն դեպքում, եթե միջանցքի վերաբերյալ փաստաթուղթ ստորագրվի, ապա կարելի է մոռանալ Սյունիքի մասին, դա կնշանակի նաև Հայաստանի ինքնիշխանության կորուստ:Զրուցակցի ենթադրմամբ՝ադրբեջանցիների կողմից կլինեն հորինված ճանապարհային միջադեպեր, նրանք կասեն, թե հայերը թալանում են, կամ էլ քարերով հարվածում են մեքենաներին և կպահանջեն, որ զինվորական վերահսկողություն իրականացվի, հետո կորոշեն, որ Սյունիքի մուտքի ու ելքի հատվածում ինչ-որ բազա են կառուցում՝ իբրև սահմանային բախումները կանխելու համար, ինչի արդյունքում էլ աստիճանաբար այդ հատվածը կկտրվի Հայաստանից:

Զրուցակիցը միևնույն ժամանակ քիչ հավանական համարեց, որ միջանցքի վերահսկվի ադրբեջանցիների կամ թուրքերի կողմից, ըստ նրա, միջանցքը. կլինի ռուսների վերահսկողության տակ

«Ռուսաստանը լավ է հասկանում, որ միջանցքը կամ ճանապարհը որևէ կերպ չպետք է լինի Ադրբեջանի կամ Թուրքիայի վերահսկողության տակ, պատահական չէր նաև Մարիա Զախարովայի հայտարարությունը, որ յուրաքանչյուր պետություն ինքն է իր տարածքում իրականացնելու ճանապարհների վերահսկողությունը, սա ուղիղ ակնարկ էր առ այն, որ եթե ճանապարհ կառուցվում է, ապա Հայաստանի տարածքում վերահսկողություն իրականացնելու է Հայաստանը, իսկ Ադրբեջանում՝ Ադրբեջանը »,-ասաց Գառնիկ Դավթյանը:

Աղբյուր` Փաստինֆո