Փաստ ինֆո

ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը Գորիսում էր, որտեղ այսօր տեղի էր ունենում Գորիսի համայնքապետ Առուշ Առուշանյանի գործով դատական նիստը։ Քոչարյանը լրագրողների հետ զրույցում նշեց, որ եկել է Առուշանյանին աջակցելու։

«Առուշը մեր ընկերն է, լավ հայրենասեր տղա է։ Եկել ենք աջակցել այս անարդար պրոցեսներում, որ կատարվում է իր հանդեպ, որպեսզի իրեն մենակ չզգա, իմանա, որ իր ընկերներն իր հետ են, իր կողքն են» ։

Լևոն Քոչարյանը անդրադարձավ նաև դատական գործընթացի ձգձգմանը։ Նշեց, որ կարծում է պատճառն այն է, որ իշխանությունը՝ ղեկավարով հանդերձ մոլուցք ունի ընդդիմադիր հայացքներ ունեցողների հետ կապված։

«Մենք դա նախկինում էլ ենք տեսել ուրիշ՝ ընդդիմադիր հայացքներ ունեցող մարդկանց հետ կապված։ Մի օր էլ ավել այդ մարդկանց բանտարկված պահելը կարծես իրենց կյանքի նպատակը լինի։ Այն մարդիկ, ովքեր այս անարդարության, ապօրինությունների մի մասն են կազմում, չեն հասկանո՞ւմ, որ ժամանակը անցնելու է, այս ամենը վերանալու է, բայց սա մի բիծ է, որ մնալու է իրենց կենսագրության մեջ»։

Լևոն Քոչարյանը նշեց, որ Առուշ Առուշանյանի, Մխիթար Զաքարյանի և Մանվել Փարամազյանի հանդեպ իշխանությունը անձնական վրեժխնդրություն ունի լուծելու՝ կապելով դա Սյունիքում Փաշինյանի տապալված այցերի հետ։

«Մենք բոլորս հիշում ռնք նրա այցելությունները Սյունիք և բնակչության դիմադրությունը։ Կարծում եմ դրա մեջ է տեղավորվում այս քայլը։

Փոքրոգի, ճղճիմ մարդու վրեժխնդրություն է սա»,- նշեց Քոչարյանը՝ հավելելով, որ համայնքապետերին այսօր կալանքի տակ պահելը անվտանգային հարցեր է առաջացնում հատկապես Սյունիքի մարզում։ Ըստ Լևոն Քոչարյանի, փորձելու են ամեն գնով ձգձգել դատական գործընթացը։

«Ես նաև դատավորի մոտ կաշկանդվածություն եմ տեսնում, փորձելու են ամեն գնով ձգձգել»։

Քոչարյանը հավելեց, որ այս կերպ փորձում են խորացնել հուսահատությունը հանրության շրջանում, ընկճել համայնքապետերին, բայց վստահեցրեց՝ միամտություն է այդպես մտածելը։ Հայաստանի և հատկապես սյունեցիները չպետք է անտարբեր լինեն, այլ պետք է փորձեն հակազդել ապօրինություններին, արտահայտել նաև իրենց վերաբերմունքը։

«Այս ամենի արդյունքում իրենք ուզում են, որ բնակչության մոտ առաջացնեն կամ ավելի խորացնեն հուսահատությունը։ Միամիտ կլինի կարծել, որ Առուշի պես տղային բանտարկելով կարող են ընկճել։ Հուսահատութան մեծ ալիք են ուզում բարձրացնեն, որ հետագայում ավելի հեշտ անցկացնեն այն հարցերը, որոնք ուզում են անել և որոնք այսօր օդում կախված են»,- ասաց Քոչարյանը։

Աղբյուր` Փաստինֆո