Փաստ ինֆո

«5165» շարժումը պահանջում է կառավարության հրաժարականը՝ Նիկոլ Փաշինյանի գլխավորությամբ: Այս մասին «5165» շարժման հրատապ մամուլի ասուլիսի ժամանակ հայտարարեց շարժման ներկայացուցիչ Մենուա Սողոմոնյանը։ Նա նշեց, որ իրենց բողոքի ակցիաները հետևեցին այն բանին, երբ Փաշինյանը հայտարարեց՝ պատրաստ է սահմանագծման ու սահմանազատմանը։

«Հաշվի առնելով նախկին դառը փորձը, որ մենք զիջեցինք ամեն ինչ և ոչինչ չստացանք, մեր նախնական պահանջն էր բացահայտել փաստաթղթի բովանդակությունը, այսինքն, թե ի՞նչ քարտեզներ են դրված դրանց հիմքում, ի՞նչ սկզբունքների վրա է մշակվելու փաստաթուղթը, որո՞նք են հայկական կողմի կարմիր գծերը։ Ակնհայտ է, որ իրական բովանդակությունը հանրայնացնելու մեր պահանջի հիմքում ընկած էին հետևյալ հիմնավորումները»։

Սողոմոնյանը հայտարարեց, որ նոյեմբերի 9-ի անակնկալ համաձայնագրով ունեին հիմնավոր կասկածներ, որ Նիկոլ Փաշինյանը չի կարողանում բանակցել Հայաստանի համար շահեկան դիրքից և կայացնում է միանձնյա որոշումներ։ Հայաստանի և Ադրբեջանի միջև սահմանագծումն ու սահմանազատումը համազգային գործընթաց է, որը կարող է անդառնալի հետք թողնել ՀՀ-ի և Արցախի հետագա ճակատագրերի վրա։ Հիշեցրեցին նաև, որ Նիկոլ Փաշինյանը հրապարակավ խոստացել է, որ Արցախի հարցի հետ կապված ցանկացած կարևոր որոշում ընդունելուց առաջ այդ մասին տեղեկացնելու է ժողովրդին։

Շարժման անդամները հայտարարեցին, որ օրակարգը վերկուսակցական է, առաջարկեցին քաղաքական այլ ուժերին, հասարակական միավորումներին ու անհատներին համախմբվել այդ պահանջի շուրջ։ Հարցը բարձրացրեցին խորհրդարանի և նախագահի առաջ, սակայն հրապարակային արձագանք չստացան։

Նրանց խոսքով՝ նոյեմբերի 26-ին Նիկոլ Փաշինյանը ստորագրեց եռակողմ հայտարարություն։ ՌԴ նախագահը հայտարարեց, որ մինչև տարեվերջ պատրաստ կլինեն սահմանագծման և սահմանազատման մեխանիզմները, մինչդեռ Նիկոլ Փաշինյանն ասում էր՝ խոսքը միայն հանձնաժողով ստեղծելու մասին էր։

«5165 շարժումը Հայաստանի Հանրապետության անվտանգությանը, տարածքային ամբողջականությանն ուղղված սպառնալիքները և արցախյան հիմնախնդրի կարգավորման հարցում հակահայկական քայլերի շարունակականությունը կանխելու նպատակով պահանջում է կառավարության հրաժարականը՝ Նիկոլ Փաշինյանի գլխավորությամբ»,- ասված է շարժման հայտարարությունում։

Սողոմոնյանը նշեց, որ շարժումը նախաձեռնելու է քննարկումներ, կոնսուլտացիաներ Հայաստանի քաղաքական դաշտի բոլոր ուժերի, հասարակական կազմակերպությունների ու ճանաչում ունեցող անհատների հետ, որոնք կիսում են շարժման մտահոգություններն ու համաձայն են այդ պահանջին։

Հանդիպումները կլինեն անկախ համակրանքից և ընկալումներից։ Շարժման անդամները հանդիպումներ կունենան նաև մարզերում։

Աղբյուր` Փաստինֆո