Փաստ ինֆո

Սոչիում կայացած եռակողմ հանդիպման ժամանակ Ադրբեջանի նախագահը խոսեց միայն դելիմիտացիայի մասին, մինչդեռ և՛ ՌԴ, և՛ Հայաստանի ղեկավարներն ասացին՝ դեմարկացիա և դելիմիտացիա։ «Փաստինֆո»-ի հետ զրույցի ժամանակ արձանագրել է ռազմական փորձագետ Հայկ Նահապետյանը։

Ըստ նրա՝ Ադրբեջանի ղեկավարը միայն դելիմիտացիայից խոսեց, որովհետև Ալիևն ասում է, թե իրենք դուրս չեն գալու ՀՀ այն տարածքից, որն օկուպացրել են։ Հայկ Նահապետյանը նկատեց՝ Ադրբեջանի նախագահն ասում է, որ հետո քարտեզի վրա կամրագրեն և բանակցությունների արդյունքում պարզ կդառնա՝ ինչքանով դուրս կգան։ Բացի այդ Ադրբեջանի նախագահն ընդգծեց տարածքային ամբողջականության և ինքնիշխանության ճանաչումը՝ որպես նախապայման, ինչը նշանակում է՝ Ադրբեջանը Հայաստանից պահանջում է ճանաչել իր տարածքային ամբողջականությունը, որով Արցախի էջը կփակվի։

«Մյուս հետաքրքիր դրվագն այն էր, որ և՛ ՌԴ նախագահը, և՛ Ադրբեջանի նախագահն ասացին, որ երկու պետությունների միջև սահմանները ճշտված չեն։ Սա նշանակում է, որ Ադրբեջանն ուժեղի իրավունքով կարող է գրավել, օկուպացնել ՀՀ տարածքը և դեռ պետք է ապացուցվի՝ արդյոք այդ տարածքը Հայաստանինն է, թե ոչ, որովհետև այդ սահմանները ճշտված չեն։ Այնինչ Նիկոլ Փաշինյանը ժողովրդին պարբերաբար փորձում էր համոզել, որ ԱՊՀ անդամակցությունից սկսած Հայաստանի և Ադրբեջանի յուրաքանչյուր միլիմետր ճշտված է»,-նշեց փորձագետը։

Հայկ Նահապետյանը նշում է՝ այն, ինչ Նիկոլ Փաշինյանն ասել էր առցանց մամուլի ասուլիսի ժամանակ կամ դրանից առաջ, այդ ամենը ներքին սպառման համար էր, որի թիրախը ՀՀ քաղաքացիներն էին՝ փորձելով համոզել, թե բոլոր ատյաններում սպասարկելու է ՀՀ ազգային, պետական շահերը։

«Այն կեղծիքները, որոնք մատուցվում էին մեր ժողովրդին, բանակցությունների ժամանակ շատ արագ պայթեցին, որովհետև որևէ դիրքորոշում չհայտնեց, որ երկու պետությունների միջև կան միջպետական սահմաններ և դրանք ճշտված են ու ճշտելու կարիք չկա»,-ասաց Հայկ Նահապետյանը։

Վերջինս նկատեց՝ բանակցությունների ժամանակ Ալիևը, անդրադառնալով սահմանային իրավիճակին, ասաց, որ դեպքերը, որոնք տեղի են ունեցել, համակարգային բնույթ չեն կրում, ինչը նշանակում է՝ դրանք տեղային նշանակություն ունեն։ Այսինքն` դրանք քաղաքացիների կամ զինվորականների անձնական նախաձեռնության հետևանք են, այլ ոչ թե հրամանի, ինչը Հայկ Նահապետյանի խոսքով իրականությանը չի համապատասխանում։

«Մայիսի 12-ից առ այսօր Նիկոլ Փաշինյանի ինքնախոստովանմամբ Ադրբեջանը ՀՀ տարածքից 41 ք/կմ է գրավել։ Նիկոլ Փաշինյանը դրա մասին կարող էր բարձրաձայնել, փաստել, և Ադրբեջանի նախագահն այդ դիտարկմանն առանձնապես հակադարձելու ոչինչ չուներ։ Ինչու՞ չասաց։ Առաջինը կարծում եմ՝ դա իր հոգեվիճակի մասին էր խոսում, երկրորդը՝ նա փորձում էր այդ բանակցություններում առավել մեղմ կեցվածք դրսևորել, որ հետո Ադրբեջանի զինված ուժերի կողմից նոր սադրանքներ չստանա, և երրորդ պատճառն այն է, որ Նիկոլ Փաշինյանի համար թիվ մեկ գերխնդիրն իր իշխանությունը պահելն է։ Սա այն մոտիվացիան է, որի համար Նիկոլ Փաշինյանը ցանկացած միջազգային հարթակում իրեն պահելու է ռուսական հայտնի ասացվածքի նման՝ «тише воды ниже травы»»,-ասաց Հայկ Նահապետյանը։

Փորձագետը պատահական չի համարում նաև եռակողմ բանակցությունների նախօրեին Սյունիքի համայնքապետերի հետ հանդիպումը։ Հայկ Նահապետյանը նշում է՝ ակնհայտ է, որ Նիկոլ Փաշինյանը պատրաստվում է տարածքներ զիջել, և այստեղ կա երկու տարբերակ, որոնցից մեկն այն է, որ այդ տարածքները զիջվեն պատերազմով.

«Պարտությունից հետո մեղքը կբարդի բանակի, ինքնապաշտպանական ուժերի վրա, որ լավ պատրաստված չէին, այնինչ այդ գործառույթը ՊՆ-ինն է։ Եթե Նիկոլ Փաշինյանն առանց պատերազմի զիջի տարածքները, ապա կրկին մեղավոր կլինեն Սյունիքի որոշ համայնքապետեր, որոնք հանդիպման ժամանակ իրենց համաձայնությունն են տվել առանց դիմադրության տարածքների զիջման ու խաղաղության հաստատման համար»,-նշեց Հայկ Նահապետյանը՝ հավելելով, որ երկու դեպքում էլ Նիկոլ Փաշինյանը մեղքն իր վրայից կգցի։

Աղբյուր` Փաստինֆո