Փաստ ինֆո

Երեկ ընդունված եռակողմ հայտարարությունը Հայաստանին բացարձակապես ձեռնտու չէ, դա ձեռնտու է միայն Հայաստանի ներկայիս կապիտուլյանտ ղեկավարին: Այս մասին «Փաստինֆո»-ի եթերում հայտարարել է ԱԱԾ նախկին ղեկավար Դավիթ Շահնազարյանը՝ արձանագրելով, որ տվյալ հայտարարության մեջ չկա որևէ բառ կամ արտահայտություն, որը կբխի Հայաստանի շահերից:

Նրա գնահատմամբ` նոր եռակողմ համաձայնագրի մեջ արտացոլված են միայն Ադրբեջանի բոլոր պահանջները:

Դավիթ Շահնազարյանը վստահեցրեց, որ թեև հայտարարության մեջ նշված է տրանսպորտային և տնտեսական ճանապարհների ապաշրջափակման մասին, սակայն իրականում խոսքը միջանցքի մասին է.

«Ներկայիս իշխանությունները բազմիցս հայտարարել են, որ միջանցք չի լինելու, բայց կողմ են, որ Նախիջևանը և Ադրբեջանը կապվեն: Ինչպե՞ս եք պատկերացնում, որ այս պայմաններում ադրբեջանական մեքենան Հայաստանի տարածքով 40-50 կմ անցնի, և նրա անվտանգությունն ապահովի Հայաստանը, սա ուղղակի անհնար է»,-ասել է բանախոսը և վստահեցրել, որ ապաշրջափակվող ճանապարհները կարող են լինել միայն միջանցքներ, որոնք պետք է վերահսկվեն այլ երկրի կողմից և ոչ՝ Հայաստանի:

«Երբ Փաշինյանն ասում է՝ միջանցք չի լինելու, լինելու են ճանապարհներ, սա ուղղակի նրա հերթական կեղծիքն է: Այս իրավիճակում չեն կարող լինել ճանապարհներ` ադրբեջանական տրանսպորտային միջոցների համար, որի անվտանգությունը չի ապահովվելու այլ ուժերի կողմից, սա մոռացեք», - նշել է նա:

Դավիթ Շահնազարյանը նաև արձանագրել է, որ հայտարարության մեջ գերիների վերաբերյալ որևէ կետ չկա.

«Ալիևն էլ այդ հարցը փակեց, ասաց՝ այսքան գերի ենք վերադարձրել, երկու հոգի էլ վերջերս ենք վերադարձրել»,-նկատել է բանախոսը և հավելել, որ գերիների հարցով քննություն պետք է անցկացվի, որը պետք է գաղտնի լինի: «ՀՀ իշխանությունների պատասխանատվությունն է նրանց վերադարձը, որոնք այս հարցով չեն զբաղվում»,-ասել է Շահնազարյանը:

Մանրամասները` տեսանյութում:

Աղբյուր` Փաստինֆո