Փաստ ինֆո

Երևան քաղաքի ընդհանուր իրավասության դատարանի դատավոր Վահե Միսակյանի նախագահությամբ Վազգեն Մանուկյանի դեմ հարուցված գործի դատական նիստի ժամանակ  մեղադրող կողմը ներկայացրեց թե ինչի համար է մեղադրվում ՀՓՇ առաջնորդը.

«2020 թվականի դեկտեմրերի 7-ին «Հայրենիքի փրկության շարժման» խորհրդի կողմից սկզբնական շրջանում հռչակվել էր սահմանադրական ճանապարհով օր առաջ վարչակազմից ազատվելու, անցումային հակաճգնաժամային կառավարություն ստեղծելու մասին, որը կկանխեր Հայաստանի պետականության կորուստը և կնպաստեր երկրի հետպատերազմյան առողջացմանը՝ հասարակությանը նախապատրաստելով արտահերթ խորհրդարանական ընտրություններին»,-հայտարարեց դատախազն ու ավելացրեց, որ տարածված հայտարարության մեջ որպես անցումային կառավարության վարչապետ, խորհուրդը հռչակել էր Վազգեն Մանուկյանին, որը ՝ ըստ դատախազի ներկայացրած մեղադրանքի, հետագայում իր ելույթներում հանդես է եկել իշխանությունը զավթելու սահմանադրական կարգը բռնի տապալելու կոչերով:

Դատախազը հայտնեց, որ ՀՓՇ-ի առաջնորդ Վազգեն Մանուկյանը մեղադրվում է հանրային վտանգավորության արարք կատարելու՝ իշխանությունը զավթելու հրապարակային կոչեր ուղղելու համար:

Վազգեն Մանուկյանն ի պատասխան մեղադրողի ելույթի՝ նշեց, որ 1988 թվականից սկսած 33 տարի զբաղվել է քաղաքականությամբ, ըստ այդմ էլ հազարավոր ելույթներ է ունեցել և որպես իշխանություն, և՛ որպես ընդդիմություն։ 

«Հազարավոր հոդվածներ եմ հրապարակել,  հիմա դուք դրանց մի մասը վերցրել եք ու ասում եք, որ այն քրեորեն պատժելի է: Այն ինձ չի վերաբերում, ես իմ 33 տարվա ընթացքում արված ոչ մի խոսքից չեմ հրաժարվում, այդ թվում նաև մեղադրող կողմի հիշատակած խոսքերից, բայց նպատակահարմար չեմ գնտում մեկնաբանել իմ խոսքերը»,-հայտարարեց Մանուկյանը՝ հավելելով. «Ես մեղադրանքը չեմ ընդունում, և ոչ մի խոսքիցս չեմ հրաժարվում»։

Աղբյուր` Փաստինֆո