Փաստ ինֆո

Ի վերջո՝ պարզվե՞ց այդ կորոնավիրուսն ում շունն էր: «Փաստինֆո»-ի թղթակցի հաղորդմամբ՝ կորոնավիրուսի դեմ պարտադիր պատվաստման կամ սեփական միջոցներով թեստ հանձնելու մասին ՀՀ առողջապահության նախարարի հրամանի սահմանադրականության հարցի քննության ժամանակ այս մասին հայտարարեց ՍԴ դատավոր Արևիկ Պետրոսյանը՝ դիմելով ՀՀ առողջապահության նախարարության ներկայացուցիչ, ՀՀ ԱՆ իրավաբանական վարչության պետ Աննա Անտոնյանին, սակայն այն մնաց անպատասխան:

Ինչպես արդեն տեղեկացրել ենք՝ ՍԴ-ն նշված հրամանի սահմանադրականության հարցը բարձրացրել է ԱԺ «Հայաստան» խմբակցությունը։ Զեկուցող դատավոր է Էդգար Շաթիրյանը։

ՀՀ առողջապահության նախարարության ներկայացուցիչը ներկայացրեց նախարարության դիրքորոշումը՝ կապված վիճարկվող նորմի սահմանադրականության հետ, ինչից հետո ՍԴ դատավորները հարցեր ուղղեցին ներկայացուցչին: Դատավորը հարցադրումներ հնչեցրեց՝ կապված պատվաստումների վերաբերյալ պաշտոնական հակասական տվյալների հետ, ինչի վերաբերյալ Անտոնյանը նշեց, որ համակարգը հնարավորություն չունի գեներացնելու 50-ից պակաս աշխատատեղեր ունեցող կազմակերպությունների վերաբերյալ տվյալները, իսկ ինչ վերաբերում է պարտադիր պատվաստումների կամ թեստավորման վերաբերյալ համապատասխան հրամանն ընդունելուց հետո կորոնավիրուսով վարակվածության դեպքերին, ապա բացասական ելքերի և վարակելիության դեպքերի թիվը 51 տոկոսով նվազել է:

Դատավոր Արևիկ Պետրոսյանն արձանագրեց, որ տվյալների համադրության պարագայում՝ վարակվածների և մահացածների թիվը մտահոգիչ և բարձր է:

Նախարարության ներկայացուցիչն էլ արձագանքեց՝ պատվաստանյութերը երաշխավորում են կորոնավիրուսային հիվանդության ծանր կամ ծայրահեղ ծանր ընթացքը, իսկ մահերը վրա են հասնում ծանր և ծայրահեղ ծանր ընթացքի հետևանքով, պատվաստումն ինքնին բերում է մահացության թվի նվազման: Շարունակելով հարցադրումները՝ դատավոր Պետրոսյանը հետաքրքրվեց, թե ինչու պատվաստված անձանց պարագայում ևս չի գործում 14 օրը մեկ թեստ հանձնելու պահանջը՝ նկատի ունենակով, որ պատվաստված մարդիկ ևս վարակվում են կորոնավիրուսով, այդ թվում՝ կարող են նաև մահանալ, ինչին ի պատասխան Անտոնյանը նշեց, թե պատվաստված անձանց կողմից վարակվելու հավանականությունը 5,8 տոկոսով նվազում է և վերջիններս 8 անգամ ավելի քիչ են վարակում մարդկանց: Պետրոսյանը հարցադրումներ կատարեց նաև Անահիտ Ավանեսյանի կողմից սանավիացիայով մարզեր այցեր կատարելու, ծախսված գումարի, ինչպես նաև՝ վերջինիս բացակայության մասին: Դատավորը հետաքրքրվեց, թե ինչու Ավանեսյանը չի գտնվում ՍԴ-ում, սակայն հոդաբաշխ բացատրություն այդպես էլ չտրվեց, նախարարության ներկայացուցիչն առաջարկեց հարցն ուղղել հետագայում Ավանեսյանին:

Դատավոր Արևիկ Պետրոսյանն ավարտեց հարցերը՝ հռետորական հարցով՝ նշելով. «Ի վերջո՝ պարզվե՞ց այդ կորոնավիրուսն ո՞ւմ շունն էր»:

Աշխատանքային օրվա ավարտով պայմանավորված՝ ՍԴ նիստը հետաձգվեց: Դիմումի քննությունը կշարունակվի վաղը՝ ժամը 11,00-ին:

Հեղինակ՝ Իզաբել Սահակյան

Աղբյուր` Փաստինֆո