Փաստ ինֆո

Սյունիքի մարզպետ Մելիքսեթ Պողոսյանն այսօր սկանդալային հայտարարությամբ է հանդես եկել՝  նշելով, թե ռուսներն են պահանջել, որ հայկական զորքերը զբաղեցնեն խորհրդային սահմանները։

«Մեր խնդիրն է եղել, որ «նեյտրալ զոնան» պահենք,  երեք անգամ պոստերն առաջ ենք տվել Կուբաթլուի հատվածում, հետո ՌԴ-ն չի համաձայնվել, ասել է, որ  պետք է զբաղեցնենք խորհրդային սահմանները»,- ԱԺ-ում լրագրողների հետ զրույցում հայտարարել է Մելիքսեթ Պողոսյանը:

Նշենք, որ այսօր  Սյունիքի, Արարատի, Արագածոտնի  մարզպետները, ինչպես նաեւ Գեղարքունիքի մարզպետի տեղակալը այցելել են ԱԺ՝  աշխարհազորի մասին օրենքի քննարկմանը՝  պաշտպանության ու անվտանգության հարցերով մշտական հանձնաժողովում։ 

Արձագանքելով Սյունիքի փոխմարզպետ Կարեն Քոչարյանի հայտարարությանը, որ Առուշանյան ջոկատը պատրաստ է դիմադրություն ցույց տալ և մասնակցել Սյունիքի պաշտպանությանը, Մելիքսեթ Պողոսյանն ասաց.

«Այս պահին միայն ես կարող եմ գնահատական տալ՝ պատրաստ են, թե՝ չէ, ես կարող եմ գնահատել նրանց պատրաստակամությունը՝ որպես Սյունիքի երկրապահի նախագահ և մարզպետ, միայն ասելով չի, էնքան են ստից բաներ խոսել, բայց պետք է մեր աչքով տեսնենք՝ ինչի՞ն են պատրաստ, ո՞ւմ հետ են համագործակցում»,-ասաց մարզպետը:

Վերջերս Նիկոլ Փաշինյանը հանդիպել էր Սյունիքի համայնքապետերին:

Լրագրողների հետ զրույցում Մելիքսեթ Պողոսյանն ասաց, թե հանդիպման ժամանակ Փաշինյանը վստահեցրել է, որ ոչ մի նոր փաստաթուղթ չի ստորագրվելու:

Մեկնաբանելով Նիկոլ Փաշինյանի հայտարարությունը, թե Սյունիքում ինքն է զորքերի միանձնյա հրաման տվել, մարզպետն ասաց.

«Ոչ մեկն էլ չէր ուզում, որ  զորքերը հետ քաշվեն, պրն վարչապետը երբ եկել է Գորիս խորհրդակցության, ասել է՝ անցեք Սյունիքի պաշտպանության, հետո պաշտպանության ենք անցել Սյունիքի նպաստավոր բարձունքների վրա՝ Նռնաձորից մինչև Խոզնավար: Մեր խնդիրն է եղել, որ նեյտրալ զոնան պահենք, մենք երեք անգամ պոստերն առաջ են տվել Կուբաթլուի հատվածում, հետո ՌԴ-ն չի համաձայնվել,ասել են, որ մենք պետք է զբաղեցնենք սահմանները»,- ասել է Մելիքսեթ Պողոսյանը:

Նա նշել է, որ մարզպետը  նաեւ  սահմանամերձ գյուղերի համաչափ զարգացումը՝ թե՛ պաշտպանական,թե՛ բարոյահոգեբանական առումով: «Հույսներս պետք է միայն մեզ վրա դնենք, երբ մեր խնդիրն ամբողջությամբ կատարենք, էլ որևէ խնդիր չի լինի»,- նշել է նա:

Աղբյուր` Փաստինֆո