Փաստ ինֆո

Այս իշխանությունը մեր ժողովրդի համար խորթ, թշնամի իշխանություն է և Հայաստանի համար որևիցե օգտակար բան չի կարող անել։ Լրագրողների հետ զրույցի ժամանակ ասաց ՀՀ նախկին վարչապետ Վազգեն Մանուկյանը։

Նա նշեց, որ միևնույն ժամանակ անընդհատ մեծանում են Թուրքիայի ցանկությունները.

«Տեսնում է, որ դիմացը կամք և ուժ չունեցող պետության ղեկավարություն է կանգնած, և անընդհատ շարունակելու են հարձակումները։ Իրավիճակը, որ հիմա տիրում է Հարավային Կովկասում և մեր սահմաններին, ուշ թե շուտ պատերազմի է բերելու։ Անընդհատ խաղաղության մասին խոսելով՝ Նիկոլ Փաշինյանը Հայաստանը տանում է ավելի կործանարար պատերազմի»,-նշեց Վազգեն Մանուկյանը։

Հարցին՝ չի՞ միանալու ընդդիմության պայքարին, Վազգեն Մանուկյանը ողջունեց այդ շարժումը և նկատեց՝ մարդիկ կարողանում են միավորել և ստեղծել ընդհանուր շարժում, եթե որոշակի խնդիր է դրված նրանց առջև, կա ծրագիր և ներկայացվում են հեռանկարներ, թե ինչ պետք է անել, սակայն առայժմ այդ ամենը չկա։

«Արդեն ուշ է, մեկ տարի առաջ այս ամենը պետք է վերջացած լիներ։ Այն ժամանակ ասացի, որ հայրենիքի փրկության կոմիտեն պետք է շարունակի իր գործունեությունը, կարելի է փոխել ֆորմատը, առաջնորդներին, բայց պետք չէ գնալ ընտրությունների։ Ցավոք սրտի գնացինք ընտրությունների և ստացանք նոր իրավիճակ, որը դեռ պետք է մարսենք»,-ասաց Վազգեն Մանուկյանը։

Անդրադառնալով այսօր Սոչիում ընթացող եռակողմ հանդիպմանը՝ Վազգեն Մանուկյանը նկատեց՝ հույսեր չի կապում, որ այդ հանդիպման ժամանակ ինչ-որ լուրջ բան կորոշվի։ Նա նույնիսկ չի կարծում, որ ինչ-որ փաստաթուղթ կստորագրվի, իսկ սահմանագծման ու սահմանազատման մասին խոսելը հիմա անիմաստ է։

«Դիմացդ կանգնած է թշնամի, որ ասում է՝ Երևանն էլ է ուզում վերցնել, դու նրա հետ խոսում ես սահմանների մասին։ Նույնիսկ խաղաղ պայմաններում գտնվող պետությունները տասնյակ տարիներով զբաղված են սահմանների հստակեցման հարցերով»,-նշեց Վազգեն Մանուկյանը։

Աղբյուր` Փաստինֆո